Qazaqstanda «Іzdestirý – 2018» taktıkalyq oqý-jattyǵýy óz máresine jetti

ASTANA. QazAqparat - Búgin Qazaqstan Respýblıkasynyń aýmaǵynda UQShU ujymdyq jedel den qoıý kúshteriniń jyl saıynǵy «Jaýyngerlik baýyrlastyq-2018» jedel-strategııalyq oqý-jattyǵýy sheńberinde ótkizilgen «Іzdestirý - 2018» taktıkalyq arnaıy oqý-jattyǵýy óz máresine jetti. Bul týraly Qorǵanys mınıstrliginiń resmı saıty habarlady. 

Oqý-jattyǵýdyń negizgi maqsaty - arnaıy bólimshelerdi, qurama barlaý jáne jaýyngerlik organdardy is-qımyldy birlesip josparlaý, is júzinde desanttaý jáne jaýyngerlik oq atý men soqqy avıatsııasyna maqsat kórsetý jáne artıllerııanyń atysyn retteı otyryp, kúndiz-túni taýly jerlerde olardyń jaýyngerlik úılesýi men praktıkalyq qoldanylýy.

El aýmaǵynda ótkizilgen oqý-jattyǵýdyń ereksheligi Armenııa, Belarýs, Qyrǵyz Respýblıkasy, Reseı Federatsııasy men Tájikstan Qarýly Kúshteriniń quramynan jedel toptar men bólimshelerdiń quramyna engize otyryp, QR Qarýly Kúshterinde bar basqarý organdaryn óristetý boldy. Oqý-jattyǵýdyń kezeńderi 3000-nan asa áskerı qyzmetshi men 500-den asa jaýyngerlik jáne arnaıy tehnıka, onyń ishinde, maıdandyq, armııalyq, áskerı-kólik avıatsııasy, ushqyshsyz ushý apparattary men UQShU Qarýly Kúshteriniń barlaý bólimsheleri qoldanatyn ózge de tehnıkany qosa eseptegende Qazaqstannyń bes polıgony men eki oqý-jattyǵý ortalyǵynda ótti.

   Sheshýshi kezeńde túngi ýaqytta jaýyngerlik oq atý jáne barlaý bólimsheleriniń praktıkalyq is-qımyldary pash etildi. UQShU Birikken shtabynyń bastyǵy, general-polkovnık A.A. Sıdorov QR Qarýly Kúshteri men UQShU-ǵa múshe memleketterdiń barlaý bólimderi men bólimsheleriniń oqý-jattyǵýdy uıymdastyrý jáne ótkizý, ártúrli basqarý organdarynyń úılesimdiligine, barlaý-jaýyngerlik, atys jáne soqqy tapsyrmalaryn sheber oryndalýyna joǵary baǵa berdi. Oqý-jattyǵý barysynda áskerı qyzmetshiler basqarýdy uıymdastyrý, ózara is-qımyl jasaý jáne UQShU áskerleriniń birikken, ártúrli toptamasy quramynda oqý-jaýyngerlik tapsyrmalardy oryndaý kezinde tájirıbe jınaqtady.

«Іzdestirý-2018» taktıkalyq arnaıy oqý-jattyǵýynyń qorytyndysy boıynsha, QR Qarýly Kúshteriniń basshylyǵy qoıǵan tapsyrmalar men oqý maqsattary tolyq kólemde oryndaldy.