Qazaqstanda ıslamdyq qarjylandyrýǵa baılanysty arnaıy memlekettik kompanııa qurylady
Eske sala keteıik, Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine ekinshi deńgeıdegi bankterdiń jumys istemeıtin kredıtteri men aktıvteri, qarjylyq qyzmetter kórsetý jáne qarjy uıymdary men Qazaqstan Respýblıkasy Ulttyq bankiniń qyzmeti máselesi boıynsha ózgerister men tolyqtyrýlar engizý týraly» QR Zańynyń jobasy ekinshi oqylymda maquldanǵan bolatyn.
Qujatta ekinshi deńgeıdegi bankterdegi jumys istemeıtin kredıtterdiń deńgeıin tómendetý, olardyń nesıe qorjyndarynyń sapasyn jaqsartýǵa mamandandyrylǵan strestik aktıvterdi basqarý jónindegi qyzmetti júzege asyratyn uıymdardyń ashyqtyǵyn arttyrý sharalary qarastyrylady. Budan bólek, eldiń qarjy júıesiniń turaqtylyǵyn arttyrý, zańnamadaǵy Ulttyq banktiń taratylǵan vedomstvolaryna silteme jasaý normalaryn alyp tastaý, tutynýshylardyń respýblıkanyń qarjy júıesine degen senimin jáne olardyń zańdy quqyqtary men múddelerin qorǵaý deńgeıin arttyrýǵa baǵyttalǵan QR-nyń birqatar zańnamalyq aktilerine ózgertýler men tolyqtyrýlar engizý kózdelip otyr.
«Elbasy N. Nazarbaevtyń «100 naqty qadam» Ult josparyn iske asyrý baǵytynda ıslamdyq qarjylandyrýdy uıymdastyrý máseleleri boıynda túzetýler engizildi. Osyǵan baılanysty, ıslamdyq memelkettik arnaıy qarjy kompanııasyn qurý qarastyrylady. Oǵan ıslamdyq baǵaly qaǵazdar shyǵarý quqyǵyn berý kózdeledi», - dedi depýtat Nurtaı Sabılıanov.