Qazaqstanda ıslam qarjylandyrý naryǵy nege damymaı otyr

ALMATY. QazAqparat - QR Ulttyq banki tóraǵasy Danııar Aqyshev Almatyda ótip jatqan onlaın-konferentsııa barysynda Qazaqstandaǵy ıslam qarjylandyrý naryǵy týraly aıtty, dep habarlaıdy QazAqparat tilshisi.

Onyń aıtýynsha, 2008 jyly ıslam bankteriniń Qazaqstanda jumys jasaýyna barlyq qajetti jaǵdaı jasalǵan. Alaıda qazir Qazaqstanda tolyqqandy tek 1 ıslam banki ǵana jumys jasap keledi.

«Ekinshi ıslam banki birinshi bankke qosylý qadamynyń aldynda tur. Islam banki Qazaqstanda áli de keń taraı qoıǵan joqtyǵyn kórip otyrmyz. Islam bankteri aktıvteriniń úlesi barlyq bankterdiń aktıvteriniń 0,2 paıyzyn ǵana alyp otyr», - dedi Aqyshev.

Bas bankır mundaı kórsetkishke birneshe faktor áser etip otyrǵanyn aıtty.

«Birinshiden, aqparattyń azdyǵy. Halyq bul bankterdiń qandaı qyzmet usynatynyn bile bermeıdi. Ekinshiden, bul bankterdiń el arasynda bólimsheleri joq. Sondyqtan olarǵa kóp tutynýshy bara bermeıdi. Úshinshiden, ıslam banki ónimderi paıyzdyq kórsetkishteri joq bolsa da, dástúrli bankter usynǵan ónimnen qymbat keledi. Bul jerde tabys sharıǵat qaǵıdalarymen esepteledi. Bul halyq úshin qymbatqa túsedi», - dedi Danııar Aqyshev.