Qazaqstanda iskerlik belsendilik oń aımaqta qalyptasty
«Ekonomıka men iskerlik belsendiliktiń jahandyq ósý kórsetkishteri oń aımaqta saqtalyp otyr. Halyqaralyq valıýta qorynyń sáýir aıyndaǵy boljamymen salystyrǵanda, táýekelderdiń qysqa merzimde álsireýine qaramastan, uzaqmerzimdi perspektıvada álemdik deńgeıdegi joǵary ınflıatsııa men turaqsyz geosaıası ahýal áserinen táýekelder balansy nasharlaý jaǵyna yǵysqan. PMI jahandyq kompozıttik ındeksi shilde aıynda 51,7 mánin kórsetti. Óndiris pen jańa tapsyrystardyń ósimi baıaýlaǵan kezde qyzmet sektory esebinen oń iskerlik belsendilik saqtaldy. Qazaqstanda iskerlik belsendilik te oń aımaqta qalyp, qyzmetter men óndiris sektorlary esebinen ındeks 50,7 deńgeıinde qalyptasty. Bıznes-klımat ındeksin bildiretin bıznestiń qazirgi jáne keleshek jaǵdaıyn baǵalaý 16,0 mánine deıin ósti», - dedi UB tóraǵasynyń orynbasary.
Onyń atap ótýinshe, bıyl shilde aıynda Halyqaralyq valıýta qory jahandyq ekonomıkanyń ósý boljamyn 3 paıyzǵa deıin arttyrdy. Oǵan Qytaı men Úndistan aıtarlyqtaı úles qosatyn bolady.
«Qazaqstannyń jalpy ishki óniminiń ósimine qatysty Halyqaralyq valıýta qorynyń boljamy 4,3 paıyzdan 4,8 paıyzǵa deıin kóterildi. Álemniń qor naryqtarynda ósim jalǵasyp jatyr. Mysaly, 2023 jyldyń basynan beri damyǵan elderde aktsııalar naryǵynyń MSCI World ındeksi 17,8 paıyzǵa, al AQSh-tyń 10 jyldyq memlekettik baǵaly qaǵazdarynyń kiristiligi 3,96 paıyzǵa deıin 9 bazıstik tarmaqqa kóterildi. Dollar ındeksi 1,6 paıyzǵa álsiredi. AQSh-tyń ortalyq bankteri men Eýroaımaq aqsha-kredıt saıasatyn qatańdatyp otyr. Mysaly, AQSh-tyń Federaldyq rezervtik júıesi shilde aıynda negizgi mólsherlemeni 5,25-5,50 paıyzǵa deıin 25 bazıstik tarmaqqa kóterdi. Federaldyq rezervtik júıe ekonomıkanyń turaqtalýyna baılanysty endi retsessııaǵa boljam jasamaıdy. Eýropanyń Ortalyq banki de makroekonomıkalyq derekterdiń nasharlaýyna qaramastan, mólsherlemeni 4,25 paıyzǵa deıin 25 bazıstik tarmaqqa arttyrdy», - dedi Vıtalıı Týtýshkın.