Qazaqstanda is júzinde halyqaralyq zertteý baǵdarlamalary joq - mınıstrlik

ASTANA. QazAqparat – Ǵylym jáne joǵary bilim mınıstrligi «Ǵylym qorynyń» qyzmetin transformatsııalaýdy usyndy. Bul týraly «Ashyq» NQA portalynda jarııalanǵan «Ǵylym jáne tehnologııalyq saıasat týraly» QR Zańynyń jobasyna jazylǵan, dep habarlaıdy QazAqparat tilshisi.

«Qazaqstanda is júzinde halyqaralyq zertteý baǵdarlamalary joq. Ornaǵan halyqaralyq yntymaqtastyq sonshalyqty kólemdi bolmaǵandyqtan, kóptegen zertteýshiler men uıymdar mundaı jobalar týraly bilmeıdi jáne qatyspaıdy. Kásiporyndar óndiriske ǵylymı-zertteý jáne tájirıbelik-konstrýktorlyq jumystar nátıjesinde jasalǵan tájirıbelik úlgilerdi óndiriske engizýge múddeli emes. Óıtkeni bul kóbinese qosymsha jabdyqty satyp alýdy, tehnologııany ıgerýdi, qyzmetkerler quramyn oqytýdy, ıaǵnı qolma-qol aqsha quıýdy talap etedi. Al paıda tabýǵa kepildik berilmeıdi», - delingen konsýltatıvtik qujatta.

Ǵylymnyń damýyna qolbaılaý bolyp otyrǵan bul máseleleri sheshý úshin mınıstrlik Ǵylym qorynyń qyzmetin transformatsııalaýdy josparlap otyr.

«Ekonomıkalyq tıimdilikti odan ári arttyrý maqsatynda barlyq bıznes-protsesterdiń ashyqtyǵy men móldirligin qamtamasyz etetin tetikterdi engizý arqyly «Ǵylym qory» aktsıonerlik qoǵamynyń qyzmetin transformatsııalaý josparlanyp otyr. Ǵylymı-zertteý jáne tájirıbelik-konstrýktorlyq jumystardy qarjylandyrýdy yntalandyrý maqsatynda jeke sektor qosymsha qun salyǵynan bosatý usynylady. Sonymen birge ınnovatsııalyq ınfraqurylymnyń jańadan qurylatyn elementteri úshin salyq salýdy azaıtý sııaqty qosymsha jeńildikterdi qarastyrylady», - dep máseleniń sheshý joly usynylǵan.

Konsýltatıvtik qujat 30 naýryzǵa deıin kópshilik talqylaýda bolady.