Qazaqstanda ıpoteka rásimdeý jeńildedi
«Turǵyn úı qurylys jınaq bankimen», Sberbankpen, Bank Tsentr Kredıt bankimen jáne Qazaqstan ıpotekalyq kompanııasymen birge ashylǵan ortalyq nesıe rásimdeýge ketetin ýaqytty aıtarlyqtaı qysqartady. Ortalyq halyqqa turǵyn úı nesıesi boıynsha qyzmetterdi kórsetedi jáne turǵyn úı satyp alýǵa baılanysty barlyq máselelerdi bir jerde sheshýge múmkindik beredi. Ol «bir tereze» qaǵıdaty boıynsha jumys isteıtin bolady jáne qujattardy klıentter bir keńsede jáne bir ret tapsyrady.
«Jańa ortalyq turǵyn úı máselesin páterler men úılerdiń keń tańdaýynyń arqasynda ǵana emes, sonymen qatar servısti jaqsartý jáne barlyq kezeńderde - ótinim berýden bastap ıpotekalyq nesıe alýǵa deıingi ıpotekalyq qaryzdy rásimdeý ýaqytyn qysqartý esebinen de ońaı jáne tez sheshýge múmkindik beredi. Bizdiń klıentke saýalnama toltyrý jáne qujattar paketin rásimdeý úshin bank keńselerine qosymsha kelýdiń qajeti joq», - BI Group holdıngi basqarma tóraǵasy Amangeldi Omarov aıtyp berdi.
«Qazaqstannyń turǵyn úı qurylys jınaq banki» AQ Ortalyq fılıalynyń dırektory Jansultan Mataev mundaı ortalyq páter satyp alýshylar úshin óte yńǵaıly ekendigin aıtty.
«Jyljymaıtyn múlikti satyp alý kezinde óz klıentiniń janynda bolý, ol úshin protsesti barynsha yńǵaıly jáne jaıly etý mańyzdy. NovaCity jáne Sunrise jobalary mysalynda tek bir aı ishinde qosymsha kepilsiz 130 páter resimdeldi, bul halyq úshin mańyzdy faktor bolyp tabylady. Developer men banktiń sınergııasy sońǵy paıdalanýshy úshin aıtarlyqtaı nátıje beredi», - dedi ol.
Al «Bank TsentrKredıt» AQ Basqarma tóraǵasynyń orynbasary Tımýr Ishmuratov elimizde ıpotekalyq nesıe naryǵy ósip kele jatqanyn atap ótti.
«Qazirgi ýaqytta ıpotekalyq nesıe naryǵynyń ósý qarqyny baıqalady. Bul birqatar memlekettik baǵdarlamalardyń kómegimen ıpotekalyq qaryzdar el halqynyń basym bóliginiń qol jetimdi bolýyna baılanysty. Biz BI Group ıpotekasy ortalyǵynyń ashylýyn qoldaımyz jáne jańa qurylym turǵyn úı máselelerin sheshýde oń yqpal etetinine senimdimiz», - dedi ol.
Kezdesý barysynda holdıng pen bankter yntymaqtastyq týraly memorandýmǵa qol qoıdy.
2017 jyly Qazaqstanda ıpotekalyq nesıe berý kólemi 355,8 mlrd teńgeni, aǵymdaǵy jyldyń 10 aıynda 410 mlrd teńgeni qurady. 2017 jyly BI Group-tan páterdi ıpotekamen alǵandardyń paıyzdyq kórsetkishi 5,9, al 2018 jyly 10-15 paıyzdy qurady. 2019 jyly kompanııa bul kórsetkishti 30 paıyzǵa deıin arttyrýdy josparlap otyr.
Jańa ıpoteka ortalyǵy 2018 jyldyń 20 jeltoqsanynan bastap Syǵanaq kóshesi 18/3, Viva Plaza bıznes ortalyǵynda jumysyn bastaıdy.