Qazaqstanda ınvestorlardy tekserýdi qysqartatyn jospar ázirlenedi

ASTANA. QazAqparat - Investıtsııalar jáne damý mınıstrligi men Bas prokýratýra Qazaqstanda ınvestorlar qyzmetin tekserýdi qysqartý jónindegi jospardy ázirlep jatyr. Bul týraly Úkimet otyrysynda atalǵan mınıstrliktiń basshysy Jeńis Qasymbek málim etti, dep habarlaıdy QazAqparat.

«Memlekettik organdar tarapynan ınvestorlar qyzmetin tekserýdi qysqartý boıynsha Bas prokýratýramen birlesip keshendi jospar daıarlanady. Sonymen qatar ınvestorlar shaǵymdary men problemalaryn qadaǵalaý jáne júıelik sáıkestendirýdiń jańa tetigi iske qosylady. Problemalar týyndaǵan kezde atalǵan aqparattyq júıe der kezinde tıisti memlekettik organdarǵa habar beredi», - dedi J. Qasymbek.

Atap aıtqanda bul sharalar 2018-2022 jyldarǵa arnalǵan Ulttyq ınvestıtsııalyq strategııada qamtylǵan.

Mınıstrdiń sózine qaraǵanda, ınvestorlar quqyqtaryn qorǵaý salasynda zańnamany jetildirý baǵytynda ınvestıtsııalyq ombýdsmenniń rólin kúsheıtý qadamy qarastyrylǵan.

«Budan bólek, sheteldik ınvestorlardyń «Astana» halyqaralyq qarjy ortalyǵy sot júıesine qoljetimdigin qamtamasyz etý múmkindigi qarastyrylýda", - dedi ol.

Esterińizge sala keteıik, QR Úkimetiniń otyrysynda 2018-2022 jyldarǵa arnalǵan Ulttyq ınvestıtsııalyq strategııa bekitildi.