Qazaqstanda ınvestıtsııalyq daýlardy sheshý boıynsha ınvestıtsııalyq alqa quryldy

ALMATY. QazAqparat - Qazaqstanda ınvestıtsııalyq daýlardy sheshý boıynsha QR Joǵarǵy Sotynda ınvestıtsııalyq alqa quryldy. Bul týraly búgin Almaty oblysynyń Talǵar qalasynda ornalasqan Búkilálemdik boks akademııasy ǵımaratynda «Protsessýaldyq zańnamany jańǵyrtý - sot tóreligi men quqyq qorǵaý qyzmeti tıimdiliginiń kepili» taqyrybynda ótip jatqan Halyqaralyq konferentsııa barysynda QR Joǵarǵy Sotynyń otstavkadaǵy sýdıasy Ǵalııa Maqajanova málim etti.

«Qazaqstanda 2016 jyldyń 1 qańtarynan bastap, jańa Azamattyq protsessýaldyq kodeks kúshine endi. Soǵan sáıkes, endi  ınvestıtsııalyq daýlardy birinshi ınstantsııadaǵy sot retinde Astana qalasynyń soty qaraıtyn bolady. Al eń iri ınvestorlardyń qatysýymen bolatyn daýlardy birinshi ınstantsııadaǵy sot retinde QR Joǵarǵy Soty qaraıdy. Buryndary   bul daýlar kádimgi sharýashylyq daýlar retinde mamandandyrylǵan ekonomıkalyq sottarda qaralatyn. Ári qaraı apellıatsııa oblystyq, qalalyq sottarda qaralyp júrdi. Bul kóp ýaqytty alatyn. Al endi kodekske engizilgen jańa ózgerister elimizdiń ınvestıtsııalyq tartymdylyǵyn arttyra túsedi», - dedi Ǵ. Maqajanova.