Qazaqstanda ınternet-qylmystardyń sany artty

NUR-SULTAN. QazAqparat – Qazaqstanda ınternet alaıaqtyǵymen baılanysty qylmystar sany artqan. Bul týraly QR Іshki ister mınıstrligi Krımınaldyq polıtsııa departamenti bastyǵynyń orynbasary Qanat Nurmaǵambetov aıtty, dep habarlaıdy QazAqparat.

«Sońǵy jyldary búkil álemde jáne Qazaqstanda ınternet jelisi arqyly jasalatyn qylmystardyń, onyń ishinde ınternet-alaıaqtyqtyń sany artty. Jyl basynan beri úsh aıda ishki ister organdary osyndaı 6 myńnan astam qylmysty tirkedi», - dedi spıker QR ІІM aptalyq brıfınginde.

Máselen, Instagram jelisinde áıelder kıimin satý týraly jalǵan habarlandyrý jarııalaǵan Jambyl oblysynyń turǵyny ustaldy. Qazirgi ýaqytta atalǵan fakti boıynsha 40 jábirlenýshi anyqtalǵan jáne tergeý jalǵasýda.

«Qaraǵandy oblysynda da ustalǵan azamatqa qatysty qylmystyq isti tergeý barysynda ınternette avtobólshekter satý boıynsha jalǵan habarlandyrý arqyly qosymsha 23 alaıaqtyq jasaǵany anyqtaldy. Al Soltústik Qazaqstan oblysynda azamattardyń qujattarynyń kóshirmelerin paıdalana otyryp, onlaın nesıeler rásimdeý jolymen 50 urlyq jasaǵan alaıaq ustaldy», - dedi Q. Nurmaǵambetov.

Mınıstrliktiń habarlaýynsha, jyl basynan beri kıberqylmystarǵa qarsy is-qımyl baǵdarlamasy júrip jatyr. Onyń aıasynda memlekettik organdarmen, qarjy mekemelerimen, uıaly baılanys operatorlarymen, qyzmet provaıderlerimen jáne onlaın platformalarmen ózara aldyn alý sharalary jasalady.

Sonymen birge, toqsan saıyn respýblıka aýmaǵynda kıberqylmystardyń aldyn alýǵa jáne ashýǵa baǵyttalǵan jedel-aldyn alý sharalary («Anti-fraud», «Hi-tech») júrgiziledi.