Qazaqstanda ınternet-kazınolarmen kúrestiń jańa tásilderi usynylady
«Múddeli memlekettik organdar zańsyz oıyn mekemeleriniń qyzmetin tyıý maqsatynda keshendi jumys júrgizýde. Qarjylyq monıtorıng agenttigi 2021 jyldan beri 350-den astam zańsyz oıyn mekemeleriniń qyzmetin toqtatty. Zańǵa sáıkes elimizde ınternet-kazınolardyń qyzmetine tyıym salynǵandyqtan, múddeli memlekettik organdar «Kıbernadzor» aqparattyq júıesiniń kómegimen ınternet-keńistikke turaqty monıtorıng júrgizedi. 2022 jyly monıtorıngtiń nátıjesinde oıyn bıznesi salasyndaǵy zańnamany buzýdyń 6 369 faktisi tirkeldi», - dep atap ótedi Úkimet basshysy jaýabynda.
Málim bolǵandaı, Aqparat jáne qoǵamdyq damý mınıstrligi anyqtalǵan faktiler boıynsha 744 ınternet-resýrstyń ákimshiligine 153 eskertý hatyn joldady jáne 5 625 siltemege qatysty 156 uıǵarym shyǵardy.
«Qazirgi ýaqytta Tsıfrlyq damý, ınnovatsııalar jáne aeroǵarysh ónerkásibi mınıstrligi Mádenıet jáne sport, Qarjy mınıstrlikterimen jáne basqa múddeli memlekettik organdarmen birlesip, ınternet-kazınolardyń jumysyn zerdeleýde. Zerdeleýdiń nátıjesinde ınternet-kazınolarǵa qarsy is-qımyldyń jańa tásilderi usynylatyn bolady», - dedi Álıhan Smaıylov.