Qazaqstanda ınternet-alaıaqtyq órship tur

NUR-SULTAN. QazAqparat – 2021 jyldyń 10 aıynda elimizde 17 800 ınternet-alaıaqtyq tirkeldi. Bul týraly QR ІІM Krımınaldyq polıtsııa departamenti bastyǵynyń orynbasary Qanat Nurmaǵambetov aıtty, dep habarlaıdy QazAqparat tilshisi.

«Internet-alaıaqtyq qazirgi tańdaǵy elimizde jáne búkil álemde oryn alyp otyrǵan ózekti máselelerdiń biri bolyp otyr. Memleket basshysy osy jylǵy Qazaqstan halqyna Joldaýynda alaıaqtyq qylmystarǵa qarsy naqty sharalar qabyldaý kerek ekenin atap ótti. Alaıaqtar azamattardy aldaý úshin ár túrli amaldardy qoldanady. Sol sebepten, osyndaı qylmystardyń sany jyldan jylǵa kóbeıýde», - dedi ol ІІM baspasóz alańynda ótken brıfıngte.

Qanat Nurmaǵambetovtiń atap ótýinshe, tsıfrlyq tehnologııalardyń damýy olardy qoldaný arqyly jasalatyn urlyqtyń artýyna alyp keldi.

«Sońǵy ýaqytta ınternet-alaıaqtyq úlken qoǵamdyq rezonans týdyryp otyr. Eger 2019 jyly Qazaqstanda mundaı qylmystardyń sany 7 700 bolsa, 2020 jyldyń qorytyndysynda 14 myńnan asyp tústi. Osy jyldyń 10 aıynda ótken jyldyń dál osyndaı kezeńimen salystyrǵanda olardyń sany 80 paıyzǵa artyp, 17 800 qylmysqa jetip otyr», - dedi departament bastyǵynyń orynbasary.