Qazaqstanda ınternet alaıaqtyq 34 %-ǵa azaıdy

NUR-SULTAN. QazAqparat – Bıyl elimizde ınternet alaıaqtyq áreketi 34 paıyzǵa tómendegen. Bul týraly Іshki ister mınıstrliginiń ókili Shuǵyla Turlybaı málim etti, dep habarlaıdy QazAqparat tilshisi.

«Internet, onlaın qyzmet pen ІT salasyna qatysty zańbuzýshylyqtyń artýyna baılanysty ishki ister mınıstrligi keshendi sharalar qabyldap jatyr. Onyń qatarynda aldyn alý sharasy, zańbuzýshylyqty anyqtaý jáne tergeý bar. Sol sııaqty aqparat, baılanys jáne aqparattyq tehnologııa kómegimen jasalatyn qylmysqa qarsy kúres baǵdarlamasy qabyldandy», - dedi Sh.Turlybaı mınıstrlikte ótken baspasóz máslıhatynda.

Onyń aıtýynsha, elimizde kıberqylmysqa qarsy kúres maqsatynda arnaıy jedel tergeý toby jumys isteıdi.

«Ótken jyly kıberqylmystyń aldyn alyp, kúresetin shtat qyzmetkerleriniń sany kóbeıdi. Sonymen qatar ınternet alaıaqtyqty zertteýmen aınalysatyn top quryldy. Internet alaıaqtyq bıyl 3 aıdyń ishinde ótken jyldyń osy ýaqytymen salystyrǵanda 34 paıyzǵa azaıdy», - deıdi ol.

Eske sala ketsek, ótken jyly atalǵan vedomstvo elimizde ınternet alaıaqtyqtyń órship turǵanyn habarlaǵan edi. https://lenta.inform.kz/kz/kazakstanda-internet-alayaktyk-orship-tur_a3865243

Aıta keteıik, buǵan deıin mınıstrlik ókili zańsyz aınalymnan 1 myńnan astam qarý tárkilengenin jetkizdi. https://kaz.inform.kz/news/kazakstanda-zansyz-aynalymnan-1-mynnan-astam-karu-tarkilendi_a3924024