Qazaqstanda ınsýlt alǵan naýqastar sany 13,5 paıyzǵa azaıdy

ASTANA. QazAqparat - Qazaqstanda jyl basynan beri qanaınalym júıesi aýrýlarynan bolatyn ólim-jitim 8,5%-ǵa, onyń ishinde júrektiń ıshemııalyq aýrýy 12%-ǵa, jiti mıokard ınfarktisi 4,6%-ǵa, stenokardııa 10%-ǵa, ınsýlt 13,5%-ǵa tómendedi, bul rette ótken jyldyń uqsas kezeńimen salystyrǵanda ashyq júrekke jasalatyn operatsııalar sany elimiz boıynsha 7,1%-ǵa ósti, dep habarlaıdy QazAqparat.

Densaýlyq saqtaý mınıstrliginde atap ótkendeı, búginde respýblıkada 44 teri arqyly aralasý ortalyǵy jumys isteıdi, aǵymdaǵy jyly Qostanaı, Túrkistan oblystarynda taǵy 3 TKA ortalyǵy ashyldy. Sonymen qatar, aýyldyq densaýlyq saqtaýdy jańǵyrtý jónindegi ulttyq jobany iske asyrý sheńberinde Qaraǵandy, Túrkistan, Pavlodar oblystarynda jáne Abaı oblysynda taǵy 12 teri arqyly koronarlyq aralasý ortalyǵyn ashý josparlanýda, sondaı-aq júrek aýrýlaryn erte anyqtaý jáne sozylmaly júrek jetkiliksizdiginiń profılaktıkasy maqsatynda aǵymdaǵy jyldyń sońyna deıin ambýlatorııalyq-emhanalyq deńgeıde 14 SJJ kabıneti ashylady.

Jyl basynan beri 6 148 ashyq júrekke operatsııa jasaldy, júrekke ınterventsııalyq aralasýlar sany 14%-ǵa artyp, 55 000-nan astam aralasýdy qurady, bul 2022 jyldyń sáıkes kezeńimen salystyrǵanda 6 500-ge ósti.

Respýblıkada alǵash ret Ulttyq ǵylymı kardıohırýrgııalyq ortalyqtyń bazasynda aýyr sozylmaly júrek jetkiliksizdigi (SJJ) bar patsıentterdi emdeý úshin biregeı joǵary tehnologııalyq kardıohırýrgııalyq operatsııalar engizildi. Mundaı operatsııalarǵa qanaınalymyn uzaq mehanıkalyq qoldaý qurylǵysyn – júrektiń jasandy sol jaq qarynshasyn ımplantattaý jatady. 10 jyldyń ishinde kardıohırýrgııa ortalyǵyna osyndaı 460 qurylǵy ımplantattaldy, tek bıylǵy jyly 18 patsıent kiriktirilgen apparattardyń arqasynda ómir súrý múmkindigine ıe boldy.

Budan basqa, júrekke devaıstardy ımplantattaý jónindegi operatsııalar búginde óńirlik deńgeıde elimizdiń úsh ortalyǵynda – «Kardıologııa jáne ishki aýrýlar ǵylymı-zertteý ınstıtýty» AQ, «Shymkent júrek ortalyǵy» KeAQ, «Kardıohırýrgııa jáne transplantologııa ǵylymı-klınıkalyq ortalyǵy»JShS-da sátti ıgerildi.

2011 jyldan bastap Ulttyq kardıohırýrgııa ortalyǵynyń bazasynda «TAVI qolqa qaqpqshasyn teri arqyly transkateterlik ımplantattaý» biregeı tehnologııasy engizildi. Bul tehnologııa qaýip tobyndaǵy patsıentterdi emdeýdiń az ınvazıvti ádisiniń balama ádisi retinde ázirlengen, qosalqy aýrýlary bar eresekterde jıi jasalatyn operatsııalardyń biri bolyp tabylady.

Qazaqstanda barlyǵy 13 kardıohırýrgııalyq ortalyqta/bólimshede 602 qolqa qaqpaqshasyn ımplantattaý júrgizildi, onyń ishinde 2023 jyldyń birinshi jartyjyldyǵynda 80 transkateterlik TAVI qolqa qaqpaqshasyn ımplantattaý oryndaldy.

Qazaqstan Ortalyq Azııadaǵy júrek pen ókpeni transplantattaý júrgiziletin jalǵyz el bolyp tabylady. Sońǵy 10 jylda UǴKO bazasynda donorlyq júrekti transplantattaý boıynsha 86 operatsııa jasaldy. Sonymen qatar, aǵymdaǵy jyldyń shilde aıynda alǵash ret «Shymkent júrek ortalyǵy» KeAQ jáne «Kardıologııa jáne ishki aýrýlar ǵylymı-zertteý ınstıtýty» AQ qabyrǵalarynda eki patsıentke júrekti transplantattaý sátti júrgizildi.

Qazaqstandyq dárigerler júrektiń ártúrli patologııalaryn sátti emdeıdi, olardyń ishinde eń kóp taralǵan jáne qaýiptisiniń biri - júrektiń ıshemııalyq aýrýy. JIA búkil álemde 40 jastan keıin adam ólim-jitiminiń basty sebebi bolyp tabylady.

Júrek-qan tamyrlary qyzmetiniń buzylýyn konservatıvti emdeý kóp jaǵdaıda tıimsiz, sondyqtan dárigerler hırýrgııalyq aralasýǵa júginedi. Hırýrgııalyq emdeýdi qajet etetin negizgi dıagnozdardyń qataryna JIA, mıokard ınfarktisi jáne ateroskleroz jatady.

QR kardıologııa jáne kardıohırýrgııa salasyndaǵy eleýli progreske Jiti koronarlyq sındrom, sozylmaly júrek jetkiliksizdigi, ateroskleroz kezinde medıtsınalyq kómek kórsetýdi jetildirý jónindegi jol kartasynda belgilengen nysanaly ındıkatorlardy iske asyrýdyń arqasynda qol jetkizildi.