Qazaqstanda ınnovatsııalardy memlekettik qoldaýdyń 13 tetigi jumys isteıdi
dep habarlady «Ulttyq ınnovatsııalyq qor» AQ-nyń Innovatsııalyq úderisterge saraptamalyq qoldaý kórsetý ortalyǵynyń dırektory Rasýl Rahımov Pm.kz saıtyna bergen arnaıy suhbatynda.
«Innovatsııalardyń damýy adamnyń mentaldylyǵyna baılanysty, keleshekti qalaı qurýǵa bolatynyn, ol kezde qandaı tehnologııalar damıtynyn qanshalyqty kóp adam oılansa,bizde trend sonshalyqty anyqtalady jáne qoǵam tehnologııalyq ınnovatsııalarmen aınalysýǵa beıimdeledi», - deıdi R.Rahımov.
Onyń aıtýynsha, elimizde ınnovatsııalarǵa degen úlken ornyqty suranys ekonomıkanyń ken óndirý jáne munaı-gaz salalary sııaqty eń damyǵan sektorlary tarapynan týyndap otyr. Munymen shektelip qalmaı, mashına jasaý, qurylys, aýyl sharýashylyǵy, kommýnıkatsııa jáne taǵy da basqa sol sııaqty damý áleýeti zor salalarda jańa tehnologııalarǵa suranys týǵyzý kerek.
R.Rahımovtyń atap kórsetýinshe, Qazaqstan ınnovatsııalardy damytýda úlken qadam jasap otyr. Qazirgi tańda elimizde jańa tehnologııalardy memlekettik qoldaýdyń 13 tetigi jumys isteıdi.
«Olardyń ishinde ınnovatsııalyq granttar bólý tetiginiń mańyzy zor. Aǵymdaǵy jyly bul maqsatqa 7,5 mlrd. teńge qarjy bólindi. Tehnologııalardy kommertsııalandyrý júıesi iske qosyldy, alǵashqy 18 joba boıynsha 9 keńse jumysqa kiristi. Aldaǵy jyldary da osyndaı damý dınamıkasy saqtalady dep kútýdemiz»,- deıdi ol.