Qazaqstanda ınklıýzııa salasynda sarapshylar daıyndaıtyn ortalyq ashyldy

<p>ASTANA. KAZINFORM &mdash; Búgin elordada múgedektigi bar adamdarǵa arnalǵan alǵashqy oqý-ádistemelik resýrs ortalyǵy ashyldy. &laquo;Eýrazııalyq ınklıýzııa ortalyǵy&raquo; mekemesi qaladaǵy áleýmettik, kólik ınfraqurylymy jáne basqa da qyzmetterdi, týrıstik baǵdarlardy erekshe adamdarǵa qoljetimdi etýdi maqsat etip otyr.</p>

Jobany «Samuryq-Qazyna» AQ kompanııalar tobynyń biryńǵaı qaıyrymdylyq operatory - «Samruk-Kazyna Trust» qory qarjylandyrdy. Astanada bastaý alǵan bul ıgilikti is respýblıka aýmaǵyna taralyp, biryńǵaı úılestirý ortalyǵy saladaǵy túıtkildi máselelerdi sheshýge septigin tıgizedi dep kútilip otyr. Jobaǵa turǵyndarǵa qyzmet kórsetetin uıymdar men ákimdikterdiń jumysynyń tıimdiligin baǵalaıtyn tetikter engizilmek. Qazir oqý baǵdarlamalary quzyrly organdarmen kelisilip jatyr. Bolashaqta nysandardyń qoljetimdiligin baǵalaýǵa ókiletti sarapshylar men tekseristen ótken nysan-qyzmetter tizilimi (reestr) túzilmek.

Foto: Kazinform

«Bul pılottyq jobanyń mańyzy erekshe dep oılaımyn. Sebebi qolarbada otyratyn azamattarǵa jaǵdaı jasalsa, kózi kórmeıtin, qulaǵy nashar estıtin jandardyń quqyǵy eskerilmeýi múmkin. Sonymen qatar, ınklıýzııa tek pandýs ornatý ǵana emes, qoǵamnyń erekshe jandarǵa degen qarym-qatynasynyń ózgerýi dep túsingen jón. Al resýrs ortalyǵynda múgedektigi bar adamdar qatarynan arnaıy sarapshylar daıarlanyp, olardy tolyqqandy tabyspen qamtýǵa da múmkindik týady. Bunyń bári Qor basshylyǵynyń ınklıýzııany, teń qoǵamdy damytýdaǵy keshendi kózqarasynyń nátıjesi bolady dep úmittenemiz», - dep atap ótti «Samruk-Kazyna Trust» áleýmettik jobalardy damytý qorynyń bas dırektory Alfııa Adıeva.

Qaıyrymdylyq operatory jobany júzege asyrý jaýapkershiligin moınyna alǵan.

Foto: Kazinform

«Eýrazııalyq ınklıýzıvti qoǵamdy damytý qaýymdastyǵy» ZTB sekildi úkimettik emes uıymdarmen tize qosyp jumys istep otyr. Nátıjesinde 2025 jyldyń sáýir aıyna deıin qajet kezde dereý kásibı kómek kórsetetin 100 sarapshy-nusqaýshy daıarlanyp, sáıkesinshe, erekshe jandarǵa qyzmet kórsetetin alǵashqy 100 nysan paıdalanýǵa berilmek. 

Jańa dúnıege birden úırenip ketý ońaı emes. Sondyqtan mamyr aıynda ótken semınarlarda halyqaralyq standarttar tanystyryldy. Múgedektigi adamdarmen tildesý ádebi, qalada, mekemelerde olarǵa qyzmet kórsetýdi jeńildetý, ujymdyq psıhologııany qalyptastyrý máseleleri jóninde mınıstrlikter, Astana qalasy men aýdandarynyń ákimdikteri qyzmetkerleri, depýtattar men qoǵamdyq uıymdar ókilderi, «Samuryq-Qazyna» AQ kompanııalar tobynyń qyzmetkerleri oqytyldy.

Eske sala ketsek, Qor bıylǵy jańa oqý jylynda Astananyń 5 mektebinde ózindik úlgidegi ınklıýzııany qoldaý kabınetterin ashyp, erekshe bilim berýdi qajet etetin 150-den astam bala basqa qatarlastarymen birge oqı alatyn boldy.

Jalpy «Samuryq-Qazyna» AQ korporatıvtik áleýmettik jaýapkershilik aıasynda erekshe qajettilikteri bar adamdardy keshendi túrde qoldap keledi. Oǵan dálel, Qazaqstan óńirlerinde 42 ońaltý ortalyǵy, 10 sport kesheni iske qosyldy. 23 qala men eldimekende 1000-nan astam bala qatysatyn beıimdelgen sport sektsııalary jumys isteýde. Múgedektigi bar jastar tsıfrlyq kásipterge oqyp jatyr. Osylaısha adamdarǵa týǵanynan bastap járdem berilip, olardyń qoǵammen aralasýyna jan-jaqty jaǵdaı jasalyp jatyr.