Qazaqstanda ınflıatsııa deńgeıi taǵy tómendeı me

<p>ASTANA. KAZINFORM — Qarjy mamandary qańtar aıynyń qorytyndysy boıynsha ınflıatsııanyń tómendeıtinin boljap otyr. Bul rette, ekonomıkalyq zertteýler ınstıtýty Ulttyq banktiń bazalyq mólsherlemeni kezekti tómendetý týraly sheshimine qatysty saraptamalyq pikirin usyndy.</p>

«Ulttyq bank óz sheshiminde ekonomıkalyq teorııaǵa sáıkes bazalyq mólsherlemeni eń kóbi 50 bazalyq tarmaqqa tómendetetini týraly aıtqan edik, ıaǵnı bul biz kútken sheshim boldy. Ótimdilikti qamtamasyz etý úshin turaqty qol jetimdilik operatsııalary boıynsha mólsherleme 16,25 paıyz, al ótimdilikti alýǵa arnalǵan operatsııalar 14,25 paıyz deńgeıinde qalyptasty. Jyldyq ınflıatsııa bizdiń boljamdy konsensýs sheginde qalyptasady. 2023 jyldyń jeltoqsanynda boljanǵandaı jyldyq ınflıatsııa 9,8 paıyzǵa deıin tómendegen edi», — deıdi sarapshy Toqtasyn Baqbergen.

Qańtar aıynda ınflıatsııa 9,7 paıyzǵa deıin tómendeıdi degen boljam bar. Negizgi sebepterdiń biri retinde Úkimet pen Ulttyq Bank qabyldaıtyn sharalar atalady. Naqtylasaq, paıyzdyq mólsherlemelerdi kóterý jáne ınflıatsııany baqylaý men tómendetýdiń keshendi josparyn qabyldaý ınflıatsııanyń tómendeýine áser etpek.

«Nátıjesinde taýarlar men qyzmetterge suranys azaıyp, naryqtaǵy usynys ósedi. Suranys jáne usynys zańyna sáıkes, taýarlar men qyzmetter baǵasy tómendeýi tıis», — dedi T. Baqbergen.

Aıtpaqshy, sarapshylar álemdik ekonomıkanyń ósý qarqyny men energııa baǵasynyń tómendeýine basa nazar aýdarý kerek ekenin alǵa tartyp otyr. Sebebi, munyń bári 2023 jyly taýarlar men qyzmetterge, sonyń ishinde shıkizatqa degen suranystyń tómendeýine áser etken bolatyn.
                                                                                                                                                                                                                                                Oralhan Qojanov