Qazaqstanda ımporttyq taýar men azyq-túlik baǵasy 13% qymbattaǵan
«Qańtar aıynyń qorytyndysy boıynsha qazaqstandyq óndirýshiler azyq-túlik suranysynyń basym bóligin jergilikti ónimmen qamtamasyz ete aldy. Un – 99,7%, jumyrtqa – 97,2%, jarma men kúrish – 96,6%, qus eti – 95,5%, ósimdik maıy – 88,8%, makaron ónimderi – 96,6%, kespe jáne basqa da uqsas un ónimderi – 85,1% jergilikti ónimmen qamtyldy.
Sút ónimderi segmentinde ózindik qamtý deńgeıi – 84,4%. Alaıda, jergilikti óndirýshiler sary maıǵa degen suranystyń 67,9%, irimshik ónimderine degen suranystyń 53,7% ǵana jaba bildi», delingen maqalada.
Saıttyń málimeti boıynsha, shujyq ónimderiniń 62,3%, kókónis pen jemistiń 50,2%, óńdelgen jáne konservilengen balyqtyń 47,6%, shokoladtyń 36,2%, qanttyń 35,8%, shaı men kofeniń 29,9% jergilikti ónimmen qamtylǵan.
«Qańtar aıynyń qorytyndysy boıynsha ımporttyq taýar men azyq-túlik baǵasy bir jylda 12,8% qymbattaǵan. Onyń ishinde TMD elderinen keletin ımporttyń baǵasy 21,3%, ózge elderden keletin taýar baǵasy 4,9% ósken.
Azyq-túliktiń ishinde qant pen qanttan jasalatyn kondıterlik ónim baǵasy 38,7%, et, balyq, teńiz ónimderiniń baǵasy 32,3%, maı ónimderi 26,9%, shujyq ónimderi 20,6%, kúnbaǵys maıy 15% qymbattaǵan», - dep jazady Energyprom.kz.