Qazaqstanda ıgi ister marafony bastaldy

<p>ASTANA. KAZINFORM &mdash; Qazaqstan Respýblıkasynyń Mádenıet jáne aqparat mınıstrligi &laquo;Ulttyq volonterler jelisi&raquo; ZTB-men birlesip, &laquo;Igi ister marafony&raquo; jobasynyń bastalǵanyn habarlaıdy. Bul biregeı joba barlyq qazaqstandyqtardyń volonterlik, qaıyrymdylyq ispen aınalysýyna yqpal etedi. Bul týraly vedomstvonyń baspasóz qyzmeti málim etti.&nbsp;</p>

Memleket basshysy Ulttyq quryltaıdyń úshinshi otyrysynda halqymyzdyń qanyna janashyrlyq, qamqorlyq, baýyrmaldyq sııaqty asyl qasıetter sińgenin atap ótti. 

Uıymdastyrýshylar «Igi ister marafony» halyqtyń janashyrlyq qasıetterin kópke nasıhat etip, atalǵan sózderdiń jarqyn dáleli bolatynyna senim bildiredi.

«Joba aıasynda kúntizbedegi mańyzdy kúnderge, halyqaralyq jáne túrli áleýmettik jáne mádenı taqyryptarǵa arnalǵan „Jaqsylyq aptalyǵy“ men jyl saıynǵy taqyryptyq is-sharalar ótkizý josparlanyp otyr. Taqyryptardyń ataýy jyl saıyn ózgerip otyrady, bul áleýmettik jaýapkershiliktiń túrli salalaryna qyzyǵýshylyqty arttyra otyryp, ózekti máselelerdiń alýan túrliligi men keń aýqymyn qamtıdy. „Igi ister marafonynyń“ osy aptasy ekologııaǵa arnalady. Jobaǵa qatysý úshin jasaǵan ıgi is týraly áleýmettik jelilerde aqparat jarııalap, Qazvolunteer.kz onlaın platformasynda tirkeýden ótý qajet», - delingen habarlamada.

Marafon qorytyndysy boıynsha, eń belsendi qatysýshylar alǵys hattarmen jáne estelik syılyqtarmen marapattalady. Jobaǵa qatysý úshin tolyq aqparat pen nusqaýlyqty Qazvolunteer.kz saıtynan alýǵa bolady jáne áleýmettik jelidegi @kz_nvs jáne @qazvolunteer.kz paraqshalarynan taba alasyzdar.