Qazaqstanda ID-kartalardyń múmkindikteri keńeıtiledi – Eńbek mınıstrligi

NUR-SULTAN. QazAqparat - QR Eńbek jáne halyqty áleýmettik qorǵaý mınıstrliginde Qazaqstannyń barlyq óńirlerinde áleýmettik ID-kartalardy engizý máselesi boıynsha oblys jáne respýblıkalyq mańyzy bar qala ákimdikterimen selektorlyq keńes ótti, dep habarlaıdy QazAqparat.

Atalǵan mınıstrliktiń málimetine qaraǵanda, búgingi tańda áleýmettik kartalar Aqtóbe, Nur-Sultan jáne Almaty qalalarynda engizilgen. Olar jol aqysyn tóleýge, ataýly áleýmettik kómek, kepildik berilgen áleýmettik toptama jáne basqa da áleýmettik qyzmet túrlerin alýǵa múmkindik beredi.

Atap aıtqanda, Aqtóbede «Qazposhta» AQ bank kartasy negizinde 40 myńnan astam áleýmettik karta shyǵaryldy. 6 aı ishinde aqsha aınalymy 841 mln teńgeni qurady. Kartalardyń ıeleri mektep ashanalarynda tamaqtanýǵa, jolaqysyn tólep, tegin retsept boıynsha dári-dármek ala alady.

Nur-Sultanda Astra biryńǵaı kólik kartasy jumys isteıdi. 1,5 mln kartanyń 120 myńy oqýshylarǵa, 135 myńy azamattardyń jeńildikti sanattary úshin shyǵaryldy. Ortasha aılyq aqsha aınalymy 1,5 mlrd teńgeni qurady. Biryńǵaı mektep kartasyn paıdalana otyryp, qala oqýshylary Bala pay jáne Feeb me elektrondyq júıeleri arqyly tamaqtanýdy tóleýge múmkindigi bar.

Almatyda bul júıe «Ońaı» kólik kartasynyń bazasynda jumys isteıdi. 2,9 mln shyǵarylǵan kartanyń 333 myńy mektep oqýshylaryna, 422 myńy stýdentterge arnalǵan jáne 241 myńy – jeńildikti. Olar boıynsha ortasha aılyq aınalym 2 mlrd teńgeni qurady. «Ońaı» kartalarynyń ıeleri qoǵamdyq kólikte jol júrý aqysyn tóleı alady, mýzeılerge, kitaphanalarǵa, kınoǵa bıletter satyp ala alady, mádenı is-sharalarǵa qatysady. Almatyda mektep ashanalarynda tamaqtanýdy tóleý múmkindigin engizý josparlanyp otyr.

QR Eńbek jáne halyqty áleýmettik qorǵaý vıtse-mınıstri Erlan Áýkenovtiń aıtýynsha, ID-kartalardyń múmkindikteri keńeıtiledi. Ardagerler, zeınetkerler, múgedektigi bar adamdar, tabysy az jáne kópbalaly otbasylar negizgi nysanaly toptar bolady. Ákimdikter ónim berýshilerdi ózderi tańdaıdy. Qazirgi ýaqytta 13 óńir kimmen jumys isteıtinin anyqtady.

Álemdik tájirıbede áleýmettik ID-kartalar birqatar elderde paıdalanylady. Mysaly, Avstrııada, Estonııada, Malaızııada, Italııa men Reseıde adamdar áleýmettik tólemder men arnaıy plastıkalyq kartalar arqyly járdemaqy alady.