Qazaqstanda ICOM aıasyndaǵy jumystar jańǵyrtylady

NUR-SULTAN. QazAqparat – QR Ulttyq mýzeıinde «Halyqaralyq mýzeıler keńesiniń qazaqstandyq komıteti» zańdy tulǵalar birlestiginiń otyrysy ótti, dep habarlaıdy QazAqparat.

«ICOM-da (Halyqaralyq mýzeıler keńesiniń) júrgen sheteldik azamattar ıÝNESKO-da kezdesken kezde bizdiń komıtettiń jumysy jaıynda surap júredi. Atap aıtqanda, bul baǵyttaǵy yntymaqtastyq sharalaryna qyzyǵýshylyq bar. Osy oraıda ICOM-daǵy qazaqstandyq komıtetettiń jumysyn jańǵyrtý maqsatyn qoıyp otyrmyz», - dedi «Halyqaralyq mýzeıler keńesiniń qazaqstandyq komıteti» ZTB prezıdenti, QR Ulttyq mýzeıi dırektorynyń orynbasary Armaz Nurazhan.

Ol atalǵan uıymǵa basshylyq etýine kandıdatýrasyn qoldaǵany úshin otyrysqa qatysýshylarǵa alǵysyn aıtyp, aldaǵy jumystardy sapaly iske asyrý úshin kúsh-jigerin salýǵa ýáde etti.

«ICOM -nyń qazaqstandyq quryltaıshylary otyrysynyń basty maqsaty – qazaqstandyq komıtet jumysyn jańǵyrtý jáne halyqaralyq arenaǵa shyǵý», - dedi A. Nurazhan.

Otyrys barysynda Qazaqstan ICOM jarǵysyna ózgertýler men tolyqtyrýlar engizilip, sondaı-aq 2020 jylǵa ICOM jumysynyń jospary bekitildi.

Aıta keteıik, Halyqaralyq mýzeıler keńesi (ICOM) 1946 jyly quryldy. Onyń quramynda 141 elden 40 myńnan astam múshe tirkelgen. Sonymen qatar, atalǵan uıymda 119 ulttyq komıtet pen 30 halyqaralyq komıtet qamtylǵan. Búginde onyń aıasynda mýzeı salasyndaǵy bilikti mamandardyń biregeı jelisi qalyptasqan.