Qazaqstanda I toptaǵy múgedektiń kútimi boıynsha járdemaqy engizildi

NUR-SULTAN. QazAqparat - «Qazaqstan Respýblıkasynyń keıbir zańnamalyq aktilerine azamattardyń jekelegen sanattaryn áleýmettik qorǵaý máseleleri boıynsha ózgerister men tolyqtyrýlar engizý týraly» zańyna (budan ári – Zań) sáıkes, Qazaqstanda múgedektik sebebine qaramastan, I top múgedegine kútim jasaıtyn adamdarǵa eń tómengi kúnkóris deńgeıiniń 1,4 mólsherinde (2021 jyly – 48023 teńge) járdemaqy engizildi. Bul týraly QazAqparat QR Eńbek jáne halyqty áleýmettik qorǵaý mınıstrliginiń baspasóz qyzmetine silteme jasap habarlaıdy.

Zańdy iske asyrý úshin Qazaqstan Respýblıkasy Densaýlyq saqtaý jáne áleýmettik damý mınıstriniń «Arnaýly memlekettik járdemaqy taǵaıyndaý jáne tóleý qaǵıdalaryn bekitý týraly» 2015 jylǵy 3 maýsymdaǵy № 445 buıryǵyna ózgerister men tolyqtyrýlar engizildi.

I toptaǵy múgedekke kútim jasaıtyn adamdar osy járdemaqyny taǵaıyndaý úshin «Azamattarǵa arnalǵan úkimet» memlekettik korporatsııasynyń bólimshelerine ótinish bere otyryp, oǵan mynadaı qujattardy qosa tapsyrady:

- jeke basyn kýálandyratyn qujat (jeke kýálik, qandas kýáligi, azamattyǵy joq adamnyń kýáligi, sheteldiktiń turýǵa yqtııarhaty nemese tsıfrlyq qujattar servısinen elektrondyq qujat);

- I toptaǵy múgedekke qorǵanshylyq (qamqorshylyq) belgilengenin rastaıtyn qujat (ondaı derek bolǵan jaǵdaıda);

- kútim júzege asyrylatyn adamnyń múgedektigi týraly anyqtama;

- sáıkestendirý úshin - járdemaqy berý jónindegi ýákiletti uıymdaǵy bank shotynyń nómiri týraly málimetterdi rastaıtyn qujat;

- psıhıkalyq densaýlyq ortalyǵynda esepte turý dereginiń joqtyǵy týraly anyqtama.

Budan basqa, kútimdi júzege asyrýshy retinde aıqyndalǵan adamnyń áreket qabilettiligi týraly málimetter jeke basyn kýálandyratyn qujat boıynsha QR Ádilet mınıstrliginiń «Jeke tulǵalardyń memlekettik derekqory» aqparattyq júıesinde tekseriledi.