Qazaqstanda hrom, alıýmınıı, myrysh qory azaıyp keledi
Onyń aıtýynsha, qazir barlyq ken orny tekserilip jatyr. Óz mindettemesin oryndamaıtyn jer qoınaýyn paıdalanýshy kompanııalardan lıtsenzııa alynyp, kelisimshart buzylyp jatyr.
«Metaldardyń jekelegen túri boıynsha álemde jetekshi orynǵa ıe bolǵanmen, shıkizat bazasynyń aıtarlyqtaı tómendegenin baıqap otyrmyz. Mysaly, hrom, alıýmınıı, myrysh, mys, qorǵasyn qory azaıyp keledi. Joǵary tehnologııalyq ónimder óndirisiniń negizi bolatyn sırek jer metaldaryn barlaý báseńdegen. Biz áli kúnge deıin birinshi ótinim prıntsıpi boıynsha lıtsenzııa alǵan jańa kompanııalardyń naqty jumysyn kórmedik», - dedi Á.Smaıylov búgingi Úkimet otyrysynda.
Oǵan qosa, jer qoınaýyn zertteýdiń ǵylymı bazasy men ınfraqurylymy barynsha jańartýdy talap etedi.
Investorlardy odan ári tartýǵa qajetti geologııalyq aqparatty tsıfrlandyrý jumystary da aıaqtalǵan joq. Bilikti geologtar men geodezıst mamandar tapshy.
«12 jylda geologııalyq barlaý jumystaryn júrgizýge 2 trln teńgeden astam jeke ınvestıtsııa salyndy. Biraq soǵan qaramastan, biz jańa ken oryndaryn barlaýǵa jumsalatyn salymdar boıynsha artta qalyp otyrmyz. Atalǵan problemalardy sheshý úshin qoldanystaǵy zańnamaǵa tıisti ózgerister qabyldandy», - deıdi Úkimet basshysy.
Premer-Mınıstr Indýstrııa mınıstrligine resýrstyq bazany ulǵaıtý, sırek kezdesetin jáne sırek jer metaldar negizinde joǵary tehnologııalyq ónimder óndirisin uıymdastyrý úshin jol kartasyn ázirleýdi tapsyrdy.
Energetıka mınıstrligine «Samuryq-Qazyna» qorymen birge 2 aıda zamanaýı tehnologııalyq sheshimderdi paıdalanyp, gazdy ken oryndarynyń tarıhı derekterine taldaý júrgizý júkteldi.
«Indýstrııa, Ǵylym jáne Energetıka mınıstrlikteri jyl sońyna deıin ǵylymı baza men ınfraqurylymǵa taldaý júrgizýi kerek. Nátıjesi boıynsha olardy damytý jónindegi tıisti is-sharalar josparyn ázirleýi qajet. Tsıfrlyq damý, Indýstrııa jáne Energetıka mınıstrlikteri jyl sońyna deıin tarıhı derekterdiń barlyq túrine keshendi taldaý júrgizip, onlaın-platformany barynsha toltyrýy kerek. Indýstrııa jáne Energetıka mınıstrligi josyqsyz jer qoınaýyn paıdalanýshylarǵa sharalar qabyldap, jyl sońyna deıin barlyq ken ornyn tekserýdi aıaqtasyn», - dedi Álıhan Smaıylov.