Qazaqstanda hımııalyq zattardy utymdy retteý júıesi jolǵa qoıylmaǵan – BUU DB

NUR-SULTAN. QazAqparat – Elordada hımııalyq qaýipsizdik boıynsha Qazaqstannyń áleýetin nyǵaıtý máseleleri, sonymen qatar QR Ekologııalyq kodeksine qaýipti hımııalyq zattardy retteýge qatysty ózgertýler jobasy talqylandy, dep habarlaıdy QazAqparat tilshisi.

«Búgingi kúni Qazaqstandaǵy BUU Damý baǵdarlamasy hımııalyq zattar men qaýipti qaldyqtardy kádege jaratýǵa baǵyttalǵan birqatar jobany tabysty júzege asyryp otyr. Olardyń qatarynda Qazaqstanda turmystyq qatty qaldyqtardy basqarýdyń keshendi josparyn ázirleý, turaqty organıkalyq lastaýshylardy basqarýdyń ulttyq josparyn jańartý, Qazaqstandaǵy medıtsınalyq qaldyqtardy josparlaý men oryndy basqarý úrdisine ıntegratsııalaý syndy jobalar bar», - dedi otyrysty ashqan Qazaqstandaǵy BUU Damý baǵdarlamasy Ýrbanızatsııa jáne turaqty damý departamentiniń jetekshisi Arman Qashqynbaev.

Al BUU Damý baǵdarlamasynyń joba menedjeri Nına Gordyń aıtýynsha, Qazaqstanda hımııalyq zattardy utymdy retteý júıesi jolǵa qoıylmaǵan.

«Sońǵy jyldardaǵy statıstıka juqpaly emes aýrýlardyń, ásirese qorshaǵan ortanyń ózgeristerine barynsha sezimtal bolyp keletin balalardyń arasynda beleń alyp bara jatqandyǵyn kórsetedi. Biz muny qorshaǵan ortanyń sapasymen baılanystyryp otyrmyz», - dedi ol.

Jalpy, QR Densaýlyq saqtaý mınıstrliginiń málimetterine sáıkes,qazaqstandyqtar tynys alý aýrýlarynan jıi zardap shegedi. Máselen, 2017 jyly barlyq aýrýlardyń ishinde tynys alý derterine shaldyqqandardyń sany 42,9 paıyz bolǵan. 2009-2016 jyldary aralyǵynda balalar arasyndaǵy demikpe - 2,6 ese, al isik aýrýlary 60 paıyzǵa artqan. Týa bitken aýrýlardyń da beleń alǵany baıqalady. Aıtalyq, 2008 jyly 100 myń adamnyń ishinde 604,1, al 2005 jyly 100 myń adamǵa 999 jaǵdaı tirkelgen.