Qazaqstanda halyqtyń orta top ókilderi artyp, barynsha tabystylarǵa aınalýda
Búgin Astanada BUU Damý baǵdarlamasynyń «Ońtústiktiń órleýi: alýan túrli álemdegi adamı progress» atty ǵalamdyq baıandamasynyń aımaqtyq tusaýkeseri barysynda Syrtqy ister mınıstriniń orynbasary Alekseı Volkov osylaı málim etti.
«Búgingi tańda Qazaqstan HHІ ǵasyrdaǵy eń serpindi ekonomıkaly elder arasynda úshinshi orynda tur jáne 2000-2012 jyldar arasyndaǵy óziniń ósim qarqynynyń turaqtylyǵyn da saqtap, adam damýynyń joǵary deńgeıi saqtalǵan memleketter qataryna kirip otyr. Óz táýelsizdiginiń 22 jylynda Tuńǵysh Prezıdenttiń basshylyǵymen Qazaqstan tranzıtti ekonomıka jolynan ótti, jan basyna shaqqandaǵy tabysy ortasha elderdiń qataryna jetti. 17 mln.-ǵa jýyq halyqtyń quramynda orta toptaǵylar sany artyp, olar barynsha tabysty bolyp keledi», - dedi mınıstr orynbasary A. Volkov.
Sonymen qatar, ol sońǵy 15 jylda halyqtyń tabysy 16 esege artqanyn atap ótti. Onyń aıtýynsha, Qazaqstan damý kórsetkishterin jaqsartýǵa qatysty óziniń mindettemeleri boıynsha teńdessiz sharalaryn atqarýda. «Biz jalpylama bastapqy bilim berý, áıelder quqyn ilgeriletý, kedeılik deńgeıin tómendetý baǵyttaryna qatysty qyrýar mindetterdi atqardyq. Osy baǵytty barynsha joǵary kórsetkishterdi baǵyndyrýdy da ditteımiz. Áleýmettik salany qarjylandyrýǵa bólinip jatqan qomaqty qarajat ta óziniń oń nátıjelerin berýde. Tek sońǵy bes jyldyń ishinde elimizde ana ólimi 3 esege tómendese, bala týý 1,5 esege artty. Sońǵy 15 jylda bilim berý salasyna jumsalǵan shyǵystar 9,5 esege ósti. 1997 jyldan beri respýblıka boıynsha myńǵa tarta mektep salynyp, aýrýhanalar da osy kórsetkishten joǵary shamada boı kóterdi», - dedi A. Volkov.