Qazaqstanda halyqaralyq ıoga festıvali bastaldy

NUR-SULTAN. QazAqparat - Elimizde jyl saıyn BUU bastamasymen uıymdastyrylatyn besinshi halyqaralyq ıoga festıvali bastaldy. Ol Qazaqstanda 15-22 maýsym aralyǵynda ótkiziledi. Bul jóninde Úndistannyń Qazaqstandaǵy elshisi Prabhat Kýmar málim etti, dep habarlaıdy QazAqparat.

Elordada halyqaralyq ıoga festıvali bastaý aldy. Úndistannyń Qazaqstandaǵy elshisiniń aıtýynsha, Qazaqstandaǵy ıoganyń tanymaldyǵyn eskere otyryp, Úndistan elshiligi festıvalge qatysatyn qalalardyń sanyn ulǵaıtýdy sheshken.

«Bıyl ıoga festıvali besinshi ret ótip jatyr. Birikken ulttar uıymy 2014 jyly Ioga kúnin belgilegen bolatyn. Ol 2015 jyldan beri toılanady. Festıval 22 maýsymǵa deıin jalǵasady. Biz elordada festıvaldiń aıaqtalýyna baılanysty aýqymdy is-shara ótkizemiz. Jalpy alǵanda, mundaı is-shara búkil álem boıynsha uıymdastyrylady. Al Qazaqstanda on qalada birden toılanady», - deıdi Prabhat Kýmar.

Svamı Vıvekanand atyndaǵy Mádenıet ortalyǵynyń dırektory Sandjaı Gargtyń sózinshe, Úndistan elshisiniń bastamasymen Qazaqstan Ioganyń ortaq hattamasyna engizilgen.

«Festıval Nur-Sultan ǵana emes, Almaty, Arqalyq, Qostanaı, Oral, Taraz, Zerendi, Býrabaı jáne Qaraǵandy oblysyn qamtyp otyr. Úndistanda bul festıvalge eldiń premer-mınıstrinen bastap 30 myńnan astam adam qatysady. Ortaq hattama boıynsha, ıoga jattyǵýy 45 mınýtqa sozylady. Odan bólek, úndi mádenıet ortalyǵynda elorda turǵyndary úshin ıoga jattyǵýy turaqty túrde ótkizilip turady», - dep atap ótti Sandjaı Garg.