Qazaqstanda halyqaralyq termınderdi qabyldaý erejesi jasalady
«Ózderińizge belgili, Qazaq tili álipbıin latyn grafıkasyna kóshirý jónindegi ulttyq komıssııa janynan termınologııalyq jumys toby qurylǵan bolatyn. Termınologııalyq jumys tobynyń otyrystarynda qazaq termınologııasynyń qazirgi jaı-kúıi talqylanyp, halyqaralyq termınderdi qabyldaý qaǵıdattary saralandy. Sonymen qatar barlyq termınderge tildik, sapalyq, qoldanystyq turǵydan monıtorıng jasaýǵa kiristik. Osy jumysty atqarý barysynda qazaq tiliniń termınjasamdyq áleýeti, halyqaralyq termınderdi qabyldaýdyń qaǵıdattary da daıyndalýda. Ol úshin otandyq jáne sheteldik ǵalymdardyń termınjasamdyq ádistemesi men ádisnamasy taldanýda», - dedi ol.
Mınıstrdiń dereginshe, 2017 jyly Úkimet janyndaǵy Respýblıkalyq termınologııa komıssııasy 3000 termındi bekitti jáne rettelgen termınologııalyq qordyń jalpy sany 21 myńdy qurady. Sonymen qatar ol ótken jylǵy Respýblıkalyq onomastıkalyq komıssııanyń otyrystary jaıynda da aıtty.
«2017 jyly QR Úkimeti janyndaǵy Respýblıkalyq onomastıkalyq komıssııanyń 5 otyrysy ótti. Ortalyq, jergilikti atqarýshy organdardyń usynystary negizinde barlyǵy 1228 usynys qaralyp, 1153-i komıssııanyń oń sheshimine ıe boldy. Onyń ishinde 64 nysan, 1085 quramdas bólik jáne 4 aýdan bar», - dedi Arystanbek Muhamedıuly.