Qazaqstanda halyqaralyq áskerı oıyndar aıaqtaldy

ASTANA. QazAqparat - «Otar» 40-shy áskerı bazasynda QR Qorǵanys mınıstri general-polkovnık Sáken Jasuzaqovtyń basshylyq etýimen halyqaralyq áskerı oıyndarynyń saltanatty jabylý rásimi ótti, dep habarlaıdy QR Qorǵanys mınıstrliginiń baspasóz qyzmeti.

«2017 jylǵy halyqaralyq áskerı oıyndar aıaqtalýǵa jaqyn qaldy. Sózsiz, bul oıyn álemniń ártúrli elderi áskerleriniń tarıhyna aıryqsha úles qosty. Oıyndardyń arqasynda áskerı jáne áskerı-tehnıkalyq yntymaqtastyq qalyptasyp qana qoımaı, áskerı qyzmetshiler men áskerler arasynda shynaıy dostyq paıda bolady. Saıysqa qatysýshylardyń barlyǵynyń da daıyndyqtary myqty. Jıynda árbir áskerı qyzmetshi óziniń kásibı mashyǵy men áskerı sheberligin kórsete aldy. Sizderdi, ıaǵnı, osy saıystyń júldegerleri men jeńimpazdaryn quttyqtaımyn», - dep oıyndardyń jabylý rásiminde general-polkovnık Sáken Jasuzaqov.

Halyqaralyq áskerı oıyndar - halyqaralyq deńgeıde joǵary mártebege ıe bolǵan irgeli sharalardyń biri. ArHO-2017 sheńberinde bıylǵy jyldyń tamyzdyń 1-9 aralyǵynda Qazaqstan Respýblıkasynyń aýmaǵynda «Artıllerııalyq oq atý sheberleri», «Mergen shebi» jáne saıystyń jańa túri «Ushqyshsyz ushý apparattary eseptoptarynyń saıysy» atty iri jarystar ótti.

 

«Otar» 40-shy áskerı bazasynyń qazaqstandyq polıgonynda baıqaýlardy ótkizý úshin barlyq qajetti ınfraqurylym men sharttar qarastyrylǵan.

Al «Mátibulaq» polıgonynyń aýmaǵy «UUA eseptoptarynyń saıysy» baıqaýyn ótkizý úshin jabdyqtaldy. Saıysqa qatysý úshin Qazaqstanǵa álemniń 18 elinen 400-ge jýyq áskerı qyzmetshi keldi. «Mergen shebi» baıqaýynyń qorytyndysy boıynsha Qazaqstan Qarýly Kúshteriniń komandasy birinshi oryndy, Reseı komandasy ekinshi oryndy jáne Belarýs komandasy úshinshi oryndy ıelendi.

Kishi serjant Nursultan Baqtyoraz baıqaýdyń úzdik mergeni atansa, kishi serjant Maqsat Shynalıev pen qazaqstandyq aǵa serjant Erǵanat Qudabekov úzdik mergen juby atandy. «Artıllerııalyq oq atý sheberleri» baıqaýynyń qorytyndysy boıynsha Qazaqstan Respýblıkasy birinshi oryndy enshilese, Belarýs Respýblıkasy ekinshi oryndy jáne Reseı Federatsııasy úshinshi oryndy jeńip aldy.

Reseılik serjant Rýstam Chıktaev úzdik mehanık-júrgizýshi atansa, Belarýstan kelgen efreıtor Ivan Shvaıa úzdik kózdeýshi, Ázirbaıjannan kelgen kishi serjant Elshat Orýdjov úzdik eseptop komandıri atandy. Qazaqstandyq serjant Meıirhan Ábildaevtiń jetekshiligimen mınaatqysh eseptoby úzdik bolyp tanyldy. «Ushqyshsyz ushý apparattary eseptoptarynyń saıysy» baıqaýynyń qorytyndysy boıynsha Qazaqstan birinshi, Reseı ekinshi jáne Iran úshinshi orynǵa jaıǵasty.

Irandyq maıor Djafarıan Hamıd UUA úzdik tehnıgi, al Reseıdiń aǵa leıtenanty Vladımır Zaınchkovskıı UUA úzdik operatory atandy. Kerneıdiń áýezdi únimen júrgizýshiler komandalardy sahnaǵa shaqyryp, jeńimpazdarǵa qurmet kórsetti. Jeńimpazdar kýboktarmen, medaldarmen, dıplomdar jáne baǵaly syılyqtarmen marapattaldy.
Rásim sońynda oıyn qatysýshylarynyń nazaryna merekelik kontsert usynyldy.