Qazaqstanda halyq sanaǵyn júrgizýge qansha qarjy kerek

NUR-SULTAN. QazAqparat - QR Ulttyq ekonomıka mınıstrligi Statıstıka komıtetiniń tóraǵasy Nurbolat Aıdapkelov halyq sanaǵyna qansha qarjy jumsalatynyn aıtyp berdi, dep habarlaıdy QazAqparat tilshisi.

N.Aıdapkelov Parlament Májilisinde tilshiler saýalyna jaýap bere otyryp halyq sanaǵyn ótkizý merzimi ázirge naqtylanyp jatqanyna toqtaldy.

«2020 jyly qysta nemese kúzde ótýi múmkin. Bizde daıyndyq jáne uıymdastyrý sharalaryna qatysty máseleler boldy, sondyqtan ony 2020 jylǵa aýystyrdyq (2019 jyldan)», - dedi ol.

Sonymen qatar komıtet tóraǵasy sanaq kezinde qaǵaz jumystaryna shekteý qoıylatynyn atap ótti.

«Málimetterdi qaǵazǵa túsirýden tolyqtaı bas tartamyz, ıaǵnı barlyǵy planshettermen júrgiziledi. Oǵan qosa, balamaly tásilmen turǵyndarǵa sanaqqa ózderiniń qatysýyna múmkindik beremiz, osy oraıda mamandandyrylǵan saıt ázirlendi. Adamdar saıtqa kirip, óziniń málimetterin engize alady. Alaıda ıntervıýer árbir adamǵa barady. Bul turǵyda azamattarǵa sanaqtan ótkendigi týraly SMS jiberiledi», - dedi N. Aıdapkelov.

Onyń atap ótýinshe, sanaqty júrgizýdiń elektrondy tásili eleýli qarjy somasyn únemdeýge múmkindik beredi. Belgili bolǵandaı, halyq sanaǵyn júrgizýge shamamen 9 mlrd teńge jumsalýy yqtımal.