Qazaqstanda halyqaralyq izdeý jarııalanǵan adam Germanııadan estradıtsııalandy

<p>Búgin Bas prokýratýra men Qarjylyq monıtorıng agenttiginiń qyzmetkerleri Qazaqstan Respýblıkasynyń Syrtqy ister mınıstrligi men Interpoldyń kómegimen Germanııa Federatıvtik Respýblıkasynan &laquo;OLIMP.KZ býkmekerlik keńseniń&raquo; qyzmetine baılanysty qylmystyq topqa qatysqany úshin qylmystyq jaýapqa tartý maqsatynda Qazaqstannyń azamatshasy D-ny ekstradıtsııalady.</p>

Bul týraly Kazinform QR Bas prokýratýrasynyń baspasóz qyzmetine silteme jasap habarlaıdy.

Oǵan 2014-2019 jyldary qylmystyq toptyń quramynda zańsyz qumar oıyndaryn ótkizýge, salyq tóleýden jáne bıýdjetke tólenetin basqa da mindetti tólemderden jaltarýǵa, sondaı-aq qylmystyq jolmen alynǵan aqsha men múlikti zańdastyrýǵa qatysqany úshin kúdik keltirilip otyr.

Atalǵan quqyqqa qaıshy árekettiń nátıjesinde memleketke 86,7 mıllıard teńgeden astam shyǵyn keltirildi.

Osyǵan baılanysty oǵan qatysty sotqa deıingi tergep-tekserý bastaldy jáne oǵan halyqaralyq izdestirý jarııalandy.

Aǵymdaǵy jyldyń mamyr aıynda ol Germanııa aýmaǵynda ustaldy.

Qazirgi ýaqytta kúdikti Astana qalasynyń tergeý ızolıatoryna qamaýǵa alyndy.

Aıyp taǵylǵan qylmystardy jasaǵany úshin múlkin tárkileý, 3 jyldan 10 jylǵa deıingi merzimge bas bostandyǵynan aıyrý jazasy kózdelgen.

Іzdeýde júrgen adamdy ekstradıtsııalaý germandyq quzyretti organdarmen tyǵyz yntymaqtastyqtyń arqasynda múmkin boldy.

Budan basqa, Germanııamen ustap berý týraly sharttyń bolmaýyna qaramastan, aǵymdaǵy jyly osy elden Qazaqstanǵa adam óltirý jáne esirtki saýdasy boıynsha kúdikti taǵy 2 adam ekstradıtsııalandy.

Óz kezeginde, Germanııa tarapyna qorqytyp alý jáne zorlaý qylmystaryn jasaǵany úshin izdeýde júrgen 2 adam ustap berildi.