Qazaqstanda halal ındýstrııasyn damytý tujyrymdasyn ázirleý qajet
«Elimizde kóptegen mekemelerdiń, úkimettik jáne úkimettik emes uıymdardyń halal naryǵyna qyzyǵýshylyǵy joǵary. Sondyqtan halal máselesindegi árbir mekemeniń ornyn anyqtaý qajet. Qaı mekeme nege jaýap beretindigin belgileý kerek. Sonda ǵana biz ońtaıly halal ındýstrııasyn qura alamyz. Buǵan qosa, elimizdegi halal ındýstrııasynyń damý tujyrymdamasyn ázirleý qajet», - dedi Májıev elordada ótip jatqan halal ındýstrııasy salasyndaǵy malaızııalyq organdardyń ókilderimen kezdesý aıasynda BAQ ókilderine bergen suhbatynda.
Onyń aıtýynsha, tujyrymdama ázirleýmen aınalysatyn arnaıy jumys tobyn jasaqtap, ony júzege asyrýdyń 2017-2020 jyldarǵa nemese 2017 jyldan bastap 5 jylǵa josparyn túzý qajet. Jospar arqyly halal ındýstrııasyn damyta otyryp, halyqaralyq, álemdik halal standartyn beretin uıymdarǵa shyǵýǵa bolady.
Sondaı-aq Májıev BAQ ókilderiniń saýalyna oraı Dinı basqarma atynan tirkelgen 80-nen astam kásiporyn halal standartymen jumys isteıtindigin atap ótti.
«Biz olarǵa jaýap beremiz jáne basqarmanyń atynan dinı, sharıǵat, standart jaǵynan olardyń ónimderiniń halal ekendigine kámil sendiremiz. Al basqa mekemelerdiń qansha kásipkerlikke halal standartyn bergendigi jaıynda aqparatymyz joq. Jalpy, osydan biraz ýaqyt buryn «adal» degen logotıp jospar túrinde engizilgen. Biraq, qazirgi ýaqytta halyqaralyq standarttarǵa sáıkes «Qazaqstan Musylmandary dinı basqarmasy, al ortasynda halal» degen jazýy bar logotıp beremiz», - dedi ol.
Aıta keteıik, buǵan deıin Qazaqstan Musylmandary dinı basqarmasynyń apparat basshysy Ǵılymbek Májıevtiń elimizde halal degen bir ǵana logotıp bolýy qajet degen pikirin jarııalaǵan bolatynbyz.