Qazaqstanda halal degen bir ǵana logotıp bolýy qajet - Dinı basqarma
«Biz bir apta boıy Malaızııa elinen kelgen halal ındýstrııasyn damytý jónindegi keńesshi toppen kezdesý ótkizýdemiz. Bul jumys toby biz úshin óte mańyzdy. Óıtkeni, Qazaqstan Táýelsizdik alǵan 25 jyldyń ishinde ekonomıka, saıasat, din salalarynda úlken jetistikke jetti. Biraq, osy halal máselesin, ony retteý áli de kemshin túsip jatyr. Al malaızııalyq mamandardan biz eń aldymen halaldy qalaı damytýǵa bolatyndyǵyn bilemiz. Halal ındýstrııasy álemde úlken júıege aınalyp otyr. Qazirgi kúni halal naryǵynyń qarjy aınalymy 2,6 trln dollardy quraıdy. Sondyqtan halal standartyna qarapaıym adamdardan bastap, memlekettik emes uıymdar, memleket tarabynan da qyzyǵýshylyq óte zor. Biraq, osy qyzyǵýshylyqtyń sońyna erip ketpeı, halal adal qyzmet ekendigin qaperden shyǵarmaýǵa tıispiz», - dedi ol elordada ótip jatqan halal ındýstrııasy salasyndaǵy malaızııalyq organdardyń ókilderimen kezdesý aıasynda BAQ ókilderine bergen suhbatynda.
Onyń aıtýynsha, Qazaqstan Musylmandary dinı basqarmasy úshin halal basty paıda tabý kózi emes. Basqarmanyń basty ustanymy - elimizde halal ındýstrııasyn jolǵa qoıý.
«Kezdesý barysynda biz óz tarabymyzdan el Úkimetine, quzyrly organdarǵa birqatar usynys bermekpiz. Máselen, Qazaqstanda halal degen bir ǵana logotıp bolýy qajet. Óıtkeni, Indonezııanyń, Qyrǵyzstannyń, Brýneıdiń, Qytaıdyń halal standartyn damytý baǵyttaryn kórdik. Tájirıbege oraı bir elde bir logotıptiń bolýy - bul eń aldymen tutynýshylardyń, memlekettiń, syrttan taýar ákeletin kásipkerdiń jumys jasaýyna qolaıly jaǵdaı jasaıtyn shart. Buǵan qosa bul logotıpti berý quqyǵyna Qazaqstan Musylmandarynyń dinı basqarmasy ıe bolýy qajet. Sebebi, biz úshin halal dinı termın. Halal degenimiz Allanyń musylmandarǵa ruqsat etken asy, qyzmeti, kıimi degendi bildiredi. Jalpy, halal men haram termınderi qatar júredi. Muny Alla taǵalanyń eki qylyshy deýge bolady. Bireýi, ruqsat etiledi, halal deıdi, ekinshisi ruqsat etilmeıdi, haram deıdi. Ruqsat etilgenine ne etilmegendigine úkim berý bul din mamandaryna berilgen qyzmet», - Májıev.
Dinı basqarmanyń apparat basshysy derekterine sáıkes, qazirgi ýaqytta elimizde zańdy qurylǵan mekemeler 3-4 halal logotıpin berýde.