Qazaqstanda ǵylymı qyzmetkerlerdiń eńbekaqysyn eki ese ulǵaıtý usynyldy

NUR-SULTAN. QazAqparat – Parlament Májilisiniń jalpy otyrysynda depýtat Aıjan Sqaqova ǵylymı zertteýshiler sanynyń qysqarýyna alańdaýshylyq bildirdi. Osy oraıda Úkimet basshysynyń orynbasary Eraly Toǵajanovtyń atyna depýtattyq saýal joldandy, dep habarlaıdy QazAqparat tilshisi.

Onyń aıtýynsha, qazaqstandyq ǵylymnyń deńgeıi men áleýetiniń tómendeýi aıqyn trendke aınaldy. Daǵdarys ǵylymnyń barlyq negizgi faktorlaryna: ǵylymı kadrlarǵa, zertteý bazasyna, salany basqarý jáne qarjylandyrý modeline áser etti. Otandyq ǵylym problemalarynyń sebepterin obektıvti qarastyrǵanda birqatar mańyzdy faktorlardy kórýge bolady.

«Birinshi faktorǵa toqtalsaq, ǵylymdaǵy basty dúnıe – ǵalymdardy baǵalamaý. Resmı derekter boıynsha ǵylymı uıymdar sanynyń qysqarýy zertteýshilerdiń azaıýyna alyp keldi. Memlekettik ǴZI ǵylymı zertteýshileriniń sany 24,7 paıyzǵa qysqardy. Ǵalym doktorlarynyń sany da kemidi. Onyń ishinde tek «ınjenerlik ázirlemeler jáne tehnologııalar» baǵyty boıynsha ǵylym doktorlarynyń sany 88 paıyzǵa qysqardy», - dedi depýtat.

Osy oraıda ol ǵalymdardyń jalaqysy tómen ekenin atap ótti. Ǵylym doktorynyń ortasha jalaqysy 166 681 teńgeni, ǵylymı qyzmetkerdiń jalaqysy – 93 971 teńgeni, zerthanashy/doktoranttyń jalaqysy – 84 061 teńgeni quraıdy.

Aıjan Sqaqova ekinshi faktorǵa toqtala kele, sala retinde ǵylymnyń tıimsiz uıymdastyrýshylyq modeli – basqarýdaǵy problemalar jáne qarjylandyrýdaǵy kemshilikke toqtaldy.

Joǵaryda aıtylǵandardy eskere otyryp, Qazaqstan Halyq partııasynyń depýtattary kelesini usynady:

- Otandyq ǵylymnyń damýyn basym strategııalyq mindet jáne Qazaqstandy EYDU elderiniń deńgeıine deıin damytýdyń qajetti sharty retinde aıqyndaý. Ǵylymdy qarjylandyrýdy kezeń-kezeńmen kóterý;

- Ǵylymı qoǵamdastyqpen birlesip basqarý men qarjylandyrýdyń tıimdi júıesi bar sala retinde ǵylymnyń jańa uıymdastyrýshylyq modelin ázirleý;

- Ǵylymı uıymdardy bazalyq jáne granttyq qarjylandyrý tetiginiń júıesin qaıta qaraý;

- Ǵylymı qyzmetkerlerdiń eńbekaqysyn keminde eki ese ulǵaıtý jáne olarǵa kepildi bazalyq jalaqy belgileý.