Qazaqstanda Gollıvýd fılmderi túsirilýi múmkin
Arystanbek Muhamedıulymen kezdesýge álemdik kınokompanııalardyń prodıýserleri - M. Hıý (The Walt Disney Company), L. Ýlman (NBC Universal), G. Lı (CBS), V. Mendoza (Paramount Pictures Corporation), M. Valbreht (Warner Bros.), D. Roı (HBO) jınaldy. Qazaqstan tarapynan sondaı-aq, Qazaqstannyń AQSh-taǵy elshisi Erjan Qazyhanov jáne Kınematografııalyq óner men ǵylym akademııasynyń prezıdenti Aıman Musaqojaeva qatysty. Bul Qazaqstannyń mádenıet salasyndaǵy ýákiletti organ basshylyǵynyń álemniń ozyq kınokompanııalarymen alǵashqy kezdesýi.
«Búgingi tańda kıno tek óner túri ǵana emes, sonymen qatar ekonomıka salasynyń anyqtaýyshy. Máselen, «Avatar» fılmi jaryqqa shyqqanda, túsirilimder júrgen Jańa Zelandııaǵa álemniń túkpir-túkpirinen týrıster aǵyla bastady. Keıbir memleketter kınoqyzmet kórsetýdi tabys kózine aınaldyrǵan. Olar Vengrııa, Bolgarııa, Kanada syndy memleketter», - dedi mınıstr Arystanbek Muhamedıuly.
Muhamedıulynyń pikirinshe, álemdik deńgeıdegi kınokompanııalardyń ókilderin qazaqstandyq taraptyń usynystary qyzyqtyryp otyr. Osy oraıda naqty qadamdarǵa da qol jetkizildi.
Basty faktorlardyń biri - Qazaqstandaǵy kınoındýstrııa damýynyń barlyq qyr-syrlaryn qamtıtyn «Kıno týraly zańnyń» qabyldanýy bolmaq.
«Mańyzdy aspektilerdiń biri - Qazaqstannyń saıası turaqtylyǵy men elimizdegi ultaralyq kelisim bolyp tabylady. Bul kompanııalar óz ıntellektýaldyq jáne qarjylyq múmkidikterin tek saıası turaqty elderge salatyndary belgili. Bul oraıda Qazaqstan olar úshin óte qolaıly», - dedi Mádenıet jáne sport mınıstri.
Esterińizge sala keteıik, Qazaqstan Respýblıkasy Mádenıet jáne sport mınıstrligi álemniń jetekshi kınokompanııalarymen kınoóndiris salasynda yntymaqtastyq týraly kelissózder ótkizgen bolatyn. Los-Anjeleske jasalǵan issapar jáne «Rýhanı jańǵyrý» baǵdarlamasyn tanystyrý aıasynda mınıstrlik Qazaqstan Respýblıkasynyń AQSh-taǵy Elshiligimen birlese «Spirit of Great Steppe» sharasyn ótkizdi. Qazaqstandyq birneshe fılmniń kórsetilimi ótti. Sondaı-aq QR Halyq ártisi Aıman Musaqojaeva, Dımash Qudaıbergen jáne ózge de óner juldyzdarynyń qatysýymen kontsert berildi.