Qazaqstanda glamýr kempıng oryndary 38-ge jetti

ASTANA. QazAqparat – Bir jylda Qazaqstanda glempıng keshenderiniń sany 28-den 38-ge deıin kóbeıdi. Olar elimizdiń 8 óńirinde ashylǵan, dep habarlaıdy QazAqparat Mádenıet jáne sport mınıstrligine silteme jasap.

Glempıng – jaıly qonaq úı jaǵdaıynda tabıǵat aıasynda demalý múmkindigin biriktiretin kempıng túri. Qazir dúnıejúzi boıynsha týrıster tarapynan glempıngterge suranys artyp, tanymal bola bastady.

Glempıng qurylysy – kásipkerler úshin de qoljetimdi ári tıimdi bıznes-joba. Búginde Almaty oblysynda «Qapshaǵaı Glempıng Playa» kesheniniń qurylysy júrip jatyr.

Sondaı-aq Soltústik Qazaqstan oblysynyń Imantaý-Shalqar kýrortty aımaǵynda «A-frame glamping house Shalkar» jáne «Shalkar» glempıng-parkiniń qurylysy josparlanyp otyr. Eki keshenniń jalpy syıymdylyǵy – 110 tósek-ornyna arnalǵan.

«Byltyr elimizge 1 mıllıonǵa jýyq sheteldik týrıst keldi. Bıyl bul kórsetkish 1,4 mıllıonǵa deıin ósedi dep kútilip otyr. Sheteldikter negizinen tabıǵat aıasynda, kýrortty aımaqtarda demalysty tańdaıdy. Sol sebepti glempıngterdiń qurylysy álemdik trendke ilese otyryp, elimizdiń týrıstik tartymdylyǵyn odan ári arttyrýdyń tamasha múmkindigi», - deıdi Mádenıet jáne sport vıtse-mınıstri Erjan Erkinbaev.