Qazaqstanda gıdrotehnıkalyq qurylystardyń qaýipsizdigi týraly zań jobasy ázirlenedi

NUR-SULTAN. QazAqparat – Ekologııa, geologııa jáne tabıǵı resrýstar mınıstri Serikqalı Brekeshev gıdrotehnıkalyq qurylystardyń qaýipsizdigine qatysty jeke zań ázirlenetinin aıtty, dep habarlaıdy QazAqparat tilshisi.

«Mınıstrlik apatty sý qoımalary men gıdrotehnıkalyq qurylystardy (GTQ) qaıta qurý boıynsha jumystar júrgizip jatyr. Keıingi 5 jylda (2017-2021 j.j.) jalpy quny 12,8 mlrd teńge bolatyn 16 nysan qalpyna keltirildi. Almaty, Aqtóbe, Shyǵys Qazaqstan, Jambyl, Qaraǵandy, Qyzylorda jáne Túrkistan oblystaryndaǵy 120 myńnan astam halqy bar 16 aýyldy sý basý qaýpi joıyldy. Bıyl taǵy altaýyn qalpyna keltirý josparlanyp otyr. Bul jumystarǵa respýblıkalyq bıýdjetten 9,5 mlrd teńge qarjy qaralǵan. Qalǵan 19-y 2025 jyldyń sońyna deıin qalpyna keltiriledi. «Gıdrotehnıkalyq qurylystardyń qaýipsizdigi týraly» jeke zańdy ázirleý josparlanyp otyr», - dedi S. Brekeshev.

Onyń aıtýynsha, tasqyn sýlardy jınaqtaý úshin 2025 jylǵa deıin 9 jańa sý qoımasyn salý jospary bar. Sýdyń shoǵyrlanýynyń jalpy kólemi - 1,7 km3. Bul 6 óńirdegi (Qyzylorda, Almaty, Jambyl, Túrkistan, BQO jáne Aqmola oblystary) 70 myń adam turatyn 14 eldi mekende sý tasqyny qaýpiniń tómendeýine múmkindik beredi. Ótken jyly Túrkistan oblysyndaǵy «Keńsaı-Qosqorǵan-2» sý qoımasynyń qurylysy aıaqtaldy.

Budan buryn habarlanǵandaı, Qazaqstanda 285 eldi mekendi sý basý qaýpi saqtalyp otyr.