Qazaqstanda gazben jabdyqtaý nysandarynda 1 myńnan astam kemshilik anyqtaldy

NUR-SULTAN. QazAqparat – Qazaqstandaǵy gazben jabdyqtaý obektilerin tekserý barysynda myńnan astam buzýshylyq anyqtaldy. Bul týraly QR Tótenshe jaǵdaılar vıtse-mınıstri Mereke Pishembaev aıtty, dep habarlaıdy QazAqparat.

«Jyl basynan beri 10 aıda ónerkásiptik qaýipsizdik komıteti aýmaqtyq bólimsheleriniń memlekettik ınspektorlary gazben jabdyqtaý obektilerine 103 tekserý, onyń ishinde keste negizinde erekshe tártip boıynsha 66 tekserý jáne jospardan tys 37 tekserý júrgizdi, nátıjesinde 1 053 buzýshylyq anyqtaldy. Zańnama talaptaryn buzǵany úshin 13 jeke jáne 63 zańdy tulǵaǵa 76 ákimshilik quqyqbuzýshylyq týraly is qozǵaldy jáne jalpy somasy 9 mln teńgeden astam aıyppul salyndy», - dedi vıtse-mınıstr Ortalyq kommýnıkatsııalar qyzmetinde ótken baspasóz máslıhatynda.

Sonymen birge, bıyl mınıstrliktiń aýmaqtyq departamentteriniń qyzmetkerleri óńir ákimdikterimen birlesip osy salaǵa qatysty 953 qoǵamdyq oryndardy aralaǵan. Birlesken shara barysynda halyqqa jáne gaz ótkizetin kásiporyndarǵa 2 myńnan astam jadynama men ózge de aqparat taratylǵan.

Buǵan deıin vıtse-mınıstr Qazaqstanda gaz ballony jarylysynan qansha adam qaza tapqanyn aıtqan edi.

Sondaı-aq, halyqtyń kópshiligi gaz ballondaryn jaqyn mańdaǵy janarmaı quıý beketinen zańsyz toltyrady.