Qazaqstanda gazben qamtamasyz etý deńgeıi qandaı
«Besjyldyqta gazǵa qosylatyn balabaqshalar, mektepter, aýrýhanalar jáne áleýmettik ári kommýnaldyq saladaǵy basqa da nysandar sany 86,5 paıyzǵa artty. Bıylǵy mamyrǵa qaraı bólshek saýda tutynýshylary úshin el ishindegi taratý toraptary boıynsha jetkiziletin gaz tarıfi shamaly kólemde ósti. Tabıǵı gaz segmentinde ósim 1,5 paıyzdy (tekshe metrine 18,7 teńgege deıin) qurady», - delingen habarlamada.
Sonymen qatar, ballondarda jetkiziletin suıytylǵan gaz baǵasy 2,1 paıyzǵa ósip, 50 lıtrine 2673 teńgege deıin jetti.
Belgili bolǵandaı, tabıǵı gazben qamtylǵan ákimshilik-aýmaqtyq nysandar sany 984-ti, al suıytylǵan gaz tartylǵan nysandar 14-ti qurady. Tabıǵı gazben qamtamasyz etý boıynsha eń joǵary kórsetkish Batys Qazaqstan oblysynda tirkeldi, ıaǵnı bul óńirde 231 nysan bar. Munymen qosa, kóshbasshylar qatarynda Jambyl (178 nysan) jáne Túrkistan (148 nysan) oblystary bar.
Esterińizge sala keteıik, sońǵy bes jylda gazdy paıdalaný múmkindigin úsh mıllıonnan astam qazaqstandyq ıelendi, al halyqty gazdandyrý deńgeıi 30-dan 50 paıyzǵa deıin ósti.
«QazTransGaz» AQ málimetinshe, búginde Qazaqstanda kógildir otyndy paıdalaný múmkindigi 11 oblystyń turǵyndarynda bar. Eger de bes jyl buryn elimizde gazdandyrylǵan 1 056 402 abonent tirkelse, 2018 jyldyń qarasha aıyna qaraı bul kórsetkish 1 777 394-ke deıin artty. Bul turǵyda ósim 68 paıyz boldy. Osy arqyly, búginde tabıǵı gazdy 9 mln qazaqstandyq paıdalanyp keledi.
Taratýshy toraptarǵa qosylatyn balabaqshalar, mektepter, aýrýhanalar, túrli áleýmettik jáne kommýnaldyq sala nysandarynyń sany artýda. «QazTransGaz» AQ dereginshe, bes jylda gazdandyrylǵan kommýnaldyq-turmystyq kásiporyndar sany 22 090-nan 41 189-ǵa deıin nemese 86,5 paıyzǵa ósti.