Qazaqstanda gaz paıdalaný kólemi 35 paıyzǵa artty
«Іshki naryqta gazdy paıdalanýdyń kúrt artýyna baılanysty sońǵy bes jylda tutyný kólemi 35 paıyzǵa ósti. Boljamǵa sáıkes, mundaı qarqyn osy jyly da saqtalmaq. Alaıda, qoldanystaǵy ken oryndarynan gaz óndirý kóleminiń ulǵaıýyna úmit artýǵa bolmaıtyn sııaqty», - dedi senator.
Onyń atap ótýinshe, elimizde óndiriletin ilespe munaı gazynyń 80 paıyzdan astamy Qarashyǵanaq, Qashaǵan jáne Teńiz jobalaryna tıesili bolyp otyr. Biraq, atalǵan ken oryndarynda jumys isteıtin jer qoınaýyn paıdalanýshylarmen jasalǵan ónimdi bólý týraly kelisimge jasalǵan saraptama munaı óndirýge basymdyq beriletindigin kórsetedi.
«Sonyń aıasynda jer qyrtysy qysymyn ustap turý úshin jer qoınaýyna keri aıdalatyn gaz kólemi jyl saıyn artyp keledi. 2021 jyldyń qorytyndysynda bul kólem shamamen 39 paıyzdy qurady. Al «QazaqGaz» UK» AQ boljamyna sáıkes, bul kólem 2030 jylǵa qaraı 50 paıyzdan asyp túsedi. Buǵan qosa, jer qoınaýyn paıdalanýshylar shyǵynnyń joǵary, satyp alý baǵasy men rentabeldiliktiń tómen bolýyna baılanysty gazdy óndirý jáne qaıta óńdeýge qatysty jańa jobalardy júzege asyrýǵa qyzyǵýshylyq tanytpaıdy. Mundaı tendentsııa 2024 jyldan bastap elimizde taýarlyq gaz tapshylyǵyn týyndatýy múmkin. Al elimiz gaz qory boıynsha álemde 22-shi jáne TMD-da úshinshi orynda tur» - dedi Erik Sultanov.