Qazaqstanda gaz qymbattady

ASTANA. QazAqparat - Qazaqstanda bıyl ótken jylmen salystyrǵanda gaz tarıfi qymbattady, dep habarlaıdy QazAqparat tilshisi energyprom.kz monıtorıngtik agenttigine silteme jasap.

Ústimizdegi jyldyń shilde aıynyń qorytyndysyna sáıkes, gaz taratý jelisi boıynsha jetkiziletin tabıǵı gazdyń baǵasy bir jylda 8,2% ósken. QR-nyń iri qalalary men megapolısteri arasynda gaz tarıfiniń ósimi Taraz (19,9%) ben Aqtóbe (18,1%) qalalarynda asa qatty baıqalǵan. Tarazda gaz tarıfi bir tekshe metr úshin 23 teńgeden 25 teńgege ósken, al Aqtóbede 8 teńgeden 10 teńgege biraq kóterilgen.

Jeli boıynsha bólshek saýdadaǵy tómendetilgen gazdyń baǵasy bir jylda 9,1% ósken. Ásirese, Astana (26,9%) men Petropavl (21,7%) syndy iri qalalarda baǵa qatty kóterilgen. Astanada ótken jyly tómendetilgen gazdyń 1 kelisi 110 teńge bolsa, bıyl 140 teńgege jetken. Petropavlda bul kórsetkish 151 teńgeden 183 teńgege kóterilgen.

Sondaı-aq, ballondardaǵy tómendetilgen gazdyń quny óskenmen, 5,1% azyraq. Ásirese baǵanyń ósimi Oral (25%) men Astanada (18,2%) qatty bilinedi. Ótken jyly Oralda 50 lıtr ballon 2,4 myń teńge bolsa, bıyl 3 myń teńgege, Astanada 2,3 myń teńgeden 2,7 teńgege jetken.

Degenmen, elde tabıǵı gazdy óndirý kórsetkishi joǵarylaǵan. Alǵashqy jartyjyldyqtyń qorytyndysyna sáıkes, gaz óndirý kólemi 29,6 mlrd tekshe metrge jetken. Bul ótken jylmen salystyrǵanda 8,3% joǵary.