Qazaqstanda ǵarysh sýretteri arqyly zańsyz munaı kenishterin anyqtaý josparlanýda
Onyń sózi boıynsha, salyq organdary ǵaryshtan túsirilgen sýretterdi paıdalana bastady. Synaq retinde Aqmola oblysy Tselınograd aýdany alynǵan. Nátıjesi jaǵa ustatady.
"Aqparattyq texnologııalardy qoldanǵan kezde kóp málimetter túsedi. Mysaly, qazir biz jerserikterdi qoldaný arqyly jańa baǵdarlama bastadyq. Jerserik Memlekettik kirister komıtetine ne qatysy bar degen suraq týýy múmkin. Búgin biz birinshi kezeńin aıaqtadyq. Astana mańyndaǵy barlyq jerlerdi ǵaryshtan túsirdik. Ol jer qoınaýyn zańdy nemese zańsyz paıdalanýǵa qatysty aqparatty alý úshin jasaldy. Jerseriktik sýretter tirkelmegen jáne kelisimsiz jumys jasap jatqan jer qoınaýyn paıdalanýshylardy anyqtaý úshin qoldanamyz. Tselınograd aýdanynyń ózinde 19 zańsyz ken oryndary anyqtaldy. Topyraq, saz, qıyrshyq tas shyǵaratyn kenishter. Olarda jer qaınaýyn paıdalaný týraly kelisimshart joq. Aqparattyq texnologııany paıdalanýdyń oń tusy osy", - dedi ol.
D. Erǵojınniń sózinshe, ǵarysh túsirilimderi komıtet úshin úlken qarajat talap etpeıdi, kerisinshe ony únemdeıdi.
"Onyń quny biz úshin tıyn turady. Jedel top quryp, olarǵa qajetti quraldardy bólgenshe, birneshe sharshy shaqyrym jerdiń ǵaryshtan túsirilgen fotosýretin 30 myń teńgege alyp, qaıda barý kerektigin bilip otyrǵan áldeqaıda jyldam ári tıimdi. Tek bir ǵana aýdanda 19 zańsyz ken orny tabyldy. Biz endi keleside Batys Qazaqstanda, ortalyq Qazaqstanda munaıdy zańsyz óndirý kenishterin anyqtaýǵa kúsh salýdy josparlaýdamyz. Jańaǵy 19 ken orny sol aýdannyń kirisin eselep arttyrady. Sebebi olar salyq tóleýge mindetteledi. Bul jaqsy, sondyqtan biz osyndaı jumystardy qolǵa aldyq", - dep atap ótti ol.