Qazaqstanda Frantsııanyń jetekshi tehnıkalyq JOO fılıalyn ashý usynyldy
«Memleket basshysy Qasym-Jomart Toqaevtyń tapsyrmasyn oryndaý úshin biz álemniń jetekshi joǵary oqý oryndarymen jáne ǴZI-men, onyń ishinde Frantsııamen tehnıkalyq kadrlardy daıarlaý jáne ǵylymı taǵylymdamalardy júzege asyrý boıynsha yntymaqtastyqty nyǵaıtýǵa nıettimiz. Biz iri tehnıkalyq joǵary oqý oryndary men zerthana ókilderimen birqatar kezdesýler ótkizip, joǵary bilim men ǵylym salasyndaǵy ekijaqty yntymaqtastyqty damytý jóninde kelisimge keldik», - deıdi QR Ǵylym jáne joǵary bilim vıtse-mınıstri Talǵat Eshenqulov.
Frantsýz tarapyna Qazaqstanda jetekshi tehnıkalyq JOO fılıalyn ashý, birlesken qos dıplomdy jáne bilim berý baǵdarlamalaryn qurý, qazaqstandyq ǵalymdardy Frantsııanyń aldyńǵy qatarly oqý oryndary men ǵylymı ortalyqtaryna taǵylymdamaǵa jiberý múmkindigin qarastyrý usynyldy.
Kezdesý barysynda Polıtehnıkalyq ınstıtýttyń prezıdenti Erık Labaımen akademııalyq utqyrlyq jáne qos dıplomdy baǵdarlamalar sheńberinde yntymaqtastyq ornatý úshin qazaqstandyq seriktes JOO-ny aıqyndaý kelisildi. Frantsýz seriktesteri Qazaqstan ǵalymdary úshin taǵylymdamalardy uıymdastyrý boıynsha jumysty bastaýǵa daıyn ekendigin aıtty.
Al, «Soleil Synchroton» ǵylymı zerthanasyndaǵy kelissóz barysynda birqatar baǵyttar boıynsha yntymaqtastyq týraly, onyń ishinde qazaqstandyq zertteýshilermen birlese jumys atqarý týraly kelisim jasaldy.
Delegatsııa Frantsııanyń «Centralesupélec – Université Paris-Saclay» jetekshi joǵary oqý orynynda boldy. Bilim berý dırektory, professor Olıver Jıkkel ál-Farabı atyndaǵy QazUÝ-men birlesken ǵylymı-tehnıkalyq ortalyq qurý boıynsha jumysty jalǵastyrýǵa daıyn ekenin málimdedi. Sonymen qatar, ol Qazaqstan ǵalymdarynyń Frantsııadaǵy taǵylymdamalaryn uıymdastyrýǵa qyzyǵýshylyq bildirdi.
Bilim jáne ǵylymı zertteýler mınıstrliginiń ókili, bas dırektor Kler Jırı qazaqstandyq tarap aıtqan bastamalardy qoldap, birlesken jobalardy qarastyrýǵa daıyn ekenin jetkizdi.
Sondaı-aq ,kezdesý qorytyndysy boıynsha Qazaqstan men Frantsııanyń joǵary bilim berý uıymdary jáne ǵylymı ortalyqtarynyń forýmyn ótkizý týraly sheshim qabyldandy.