Qazaqstanda foto jáne vıdeo túsirilim baǵasy qansha turady

<p>Mereıtoı, saltanatty shara, otbasyndaǵy qýanyshty sátterde fotograf pen vıdeograftar jaldaıtynymyz belgili. Kazinform agenttigi qyzmettiń bul túri qansha turatynyn anyqtap bildi.</p>

Qyzmettiń bul túri tapsyrys berýshilerdiń qalaýyna qaraı ózgerip otyrady. Bir ǵana adamdy, tipti bir tobyn shaqyra alasyz. Qazirgi kezde elimizdiń aımaqtarynda baǵa shamalas. 

Fotograftar orta eseppen saǵatyna 10 000 teńge alady. Al vıdeooperatorlar 20 000 teńgeden suraıdy. Biraq keıde olar bir toıǵa bir baǵa bekitedi. Ol tek keshki basqosý emes, quda kútip, shańyraqtaǵy otyrysty qosa esepteıdi.

Tarazda qyzmet kórsetýshi adamnyń kásibıligi, qural-jabdyqtarynyń sapasy men komanda quramyna oraı aldyn ala eseptelgen baǵa paraqshasy bar. Munda operator qyzmeti 15 000 teńgeden bastalyp, 300 000 teńgege deıin jetedi. Al fotografty 30 000 teńgege jaldaýǵa bolady.

Aqtaý, Aqtóbe, Qostanaı, Qyzylorda men Qonaevta fotograftar qyzmeti 15 000-20 000 teńge turady. Al vıdeooperatorlar qyzmeti 100 000 teńgeden joǵarylaı beredi.

Kókshetaý, Petropavl, Taldyqorǵan fotograftary saltanatty sharalardy 30 000 teńgege túsirip beredi. Beıne túsirilim baǵasy 100 000 teńgeden bastalady. 

Oralda foto jáne vıdeooperatorlar qyzmetiniń quny 60 000 teńgeden bastalady. 

Al Pavlodar, Jezqazǵan, Qaraǵandy, Atyraý men Shymkentte vıdeooperatorlar baǵasy qoljetimdi.

Astanalyq operatorlar men fotograftar tarıfti saǵatyna esepteıdi. Fotograftar 1 saǵatqa 15 000 teńge jáne odan joǵary aqy suraıdy. Al beınetúsirilim qyzmeti saǵatyna 10 000 teńgeden bastalady.

Semeıde operatorlar qyzmeti qoljetimdi. Munda vıdeograf qyzmeti 30 000 teńge turady. 

Elimizdiń ońtústik astanasynda baǵa joǵary. Munda da foto, vıdeo túsiretin mamandar ár saǵatyna aqsha alady. Bir saǵattyq foto túsirilim baǵasy 20 000 teńge. Al beıne túsirilim baǵasy 45 000 teńgeden bastalyp, kóterile beredi.

Qyzmet kórsetýshiler fotony árlep, vıdeony montajdap ta beredi.

Infografıka: Kazinform

Eske salsaq, keshe elimizdegi qazy baǵasyn bildik.