Qazaqstanda farmatsevtıka salasynda óndiris kólemi artty
«Jalpy, elimizde farmatsevtıka salasynda óndiris kóleminiń óskenin atap ótken jón. 2021 jyly farmatsevtıka ónerkásibi oń serpin kórsetti, bul rette farmatsevtıkalyq ónimniń kólemi 2020 jylmen salystyrǵanda 124% quraıdy. Bıylǵy qańtar-sáýir aılarynda farmatsevtıkalyq ónim kólemi ótken jyldyń osy kezeńimen salystyrǵanda 5% ósti», - dedi Ajar Ǵınııat Úkimettiń búgingi otyrysynda.
Mınıstrdiń aıtýynsha, bul ósim «Hımfarm» AQ, «Nobel AFF» AQ, «Abdı Ibragım GlobalFarm» JShS, «Kelýn-Kazfarm» JShS óndiristik alańdarynda dári óndirisi kóleminiń ósýimen baılanysty boldy.
«Qazaqstanda farmatsevtıka ónerkásibi memlekettik qoldaýdyń arqasynda tıimdi ınvestıtsııanyń úlken áleýetine ıe boldy. Osylaısha, otandyq taýar óndirýshilermen memlekettik qoldaýdyń arqasynda 10 jylǵa uzaqmerzimdi sharttar jasaldy jáne ol satyp alý úlesin aqshalaı mánde 2010 jyly 15%-dan 2021 jyly 41%-ǵa deıin ulǵaıtýǵa múmkindik berdi. Sondaı-aq Densaýlyq saqtaý mınıstrligi otandyq óndirýshilerge qoldaý kórsetý úshin birqatar shara qabyldady: pandemııa kezinde otandyq dárilik zattar men medıtsınalyq buıymdardyń qaýipsizdigi men sapasyna baǵalaý júrgizý jáne otandyq dárilik zattar men medıtsınalyq buıymdardyń tirkeý saraptamasy jedeldetildi; uzaqmerzimdi sharttar jasasýǵa ónim berýshilerdi irikteý ólshemsharttary qaıta qaraldy; uzaqmerzimdi sharttardy oryndaýǵa monıtorıng júrgiziledi», - dedi Densaýlyq saqtaý mınıstri.
Biryńǵaı dıstrıbıýtor 37 otandyq taýar óndirýshimen 5 myńnan dárilik zattar men medıtsınalyq buıymdardy (811 dárilik zat jáne 4 196 medıtsınalyq buıym) jetkizýge 96 uzaqmerzimdi shart jasady.
Onyń ishinde dárilik zattarǵa - 43, medıtsınalyq buıymdarǵa - 53 uzaqmerzimdi shart jasady.
«Qazirgi ýaqytta jasalǵan sharttar sheńberinde 37 ınvestıtsııalyq joba iske asyp jatyr. Onyń ishinde 127 mlrd teńgege dárilik zattar boıynsha 12 joba, 34 mlrd teńge somasyna medıtsınalyq buıymdar boıynsha 23 joba bar. Farmatsevtıka kásiporyndary negizinen Almaty, Qaraǵandy oblystarynda, Shymkent jáne Almaty qalalarynda shoǵyrlanǵan», - dedi Ajar Ǵınııat.