Qazaqstanda farmatsevtıka ónerkásibin damytý baǵdarlamasy qabyldanady
Baspasóz qyzmetiniń málimetterine qaraǵanda, QR farmatsevtıka salasyndaǵy ahýal men damý perspektıvasy týraly ındýstrııa jáne ınfraqurylymdyq damý mınıstri B. Atamqulov, densaýlyq saqtaý vıtse-mınıstri L. Bıýrabekova, «SQ-Farmatsııa» basqarma tóraǵasy E. Esqalıev, «Hımfarm» AQ dırektory A. Isenova, «Super-pharm» JShS basshysy Q. Qaımoldaev, Medıtsınalyq buıymdardy óndirýshiler qaýymdastyǵynyń tóraıymy G. Muhamedjanova baıandady.
Bıylǵy 7 aıdyń qorytyndysy boıynsha pandemııa kezinde farmatsevtıka kásiporyndarynyń óndiris kólemi 23,2%-ǵa, 70,2 mlrd teńgege deıin artty. Salada 96 kásiporyn jumys isteıdi, onyń ishinde 33-i – dári-dármekter boıynsha, 41-i – medıtsınalyq buıymdar boıynsha, 22-si – medıtsınalyq tehnıka boıynsha. Indýstrııalandyrý kartasy aıasynda 5 myń jańa jumys ornyn qurýmen ınvestıtsııa somasy 62,9 mlrd teńge bolatyn 41 joba paıdalanýǵa berildi.
Qazaqstannyń farmatsevtıka ındýstrııasynyń «ósý núkteleri» Almaty, Shymkent qalalary men Almaty jáne Qaraǵandy oblystarynda bolyp otyr.
«Qazaqstannyń farmatsevtıka ındýstrııasynyń damý áleýeti zor. Basty mindet – jetkilikti qory men nomenklatýrasyn keńeıtýdi qamtamasyz etý arqyly dári-dármekter men medıtsınalyq buıymdardyń otandyq óndirisine serpin berý. Elimizdiń halqy úshin sapaly medıtsınalyq ónimder qoljetimdi bolýy tıis», — dedi A. Mamın.
Otandyq farmatsevtıka óndirisin odan ári damytý maqsatynda Úkimet basshysy ındýstrııa mınıstrligine bıznes qaýymdastyǵynyń pikirin eskerýmen Farmatsevtıka salasyn damytý baǵdarlamasyn ázirlep, onyń jobasyn bıylǵy qyrkúıek aıynda usynýdy tapsyrdy. Premer-Mınıstr otandyq dári-dármekter naryǵynda halyqqa qoljetimdilik pen sapany, al bıznes úshin tıimdilikti qamtamasyz etetin ońtaıly baǵalar belgilenýi tıis ekenin atap ótti. Sonymen qatar medıtsınalyq maskalar men basqa da jeke qorǵanysh quraldaryn óndirý standarttaryn bekitýdi tapsyrdy.
Densaýlyq saqtaý mınıstrligine «SQ-Farmatsııamen» birlesip, medıtsınalyq uıymdarda dári-dármekterdiń bolýyn josparlaý tetikterin qaıta qaraý, dári-dármekterdi tirkeý talaptaryn ońtaılandyrý, otandyq óndirýshiler úshin satyp alý kólemin boljaý júıesin engizý tapsyryldy. Úkimet basshysy otandyq dári-dármekterdiń syrtqy naryqtarǵa jedel shyǵýyn qamtamasyz etý, jańa dárilerdi tirkeý kezindegi kedergilerdi barynsha azaıtý qajettigin atap ótti.
A. Mamın jumys sapary aıasynda «Arselor Mıttal Temirtaý» AQ-ǵa baryp, «Qaraǵandy – Temirtaý» avtomobıl jolynyń kólik aıryǵyn qarady, sondaı-aq densaýlyq saqtaý nysandarynyń, «Qaraǵandy farmatsevtıkalyq kesheni» ımmýnobıologııalyq jáne bıofarmatsevtıkalyq preparattardy óndirý kásipornynyń, «Lınde Gaz Qazaqstan» tehnıkalyq jáne medıtsınalyq gazdardy shyǵarý zaýytynyń, «Amanat» dárilik zattar men medıtsınalyq buıymdardy saqtaý jáne qyzmet kórsetý jónindegi logıstıkalyq keshenniń jumysymen tanysty.