Qazaqstanda Eýrovıdenıe baıqaýy tikeleı efırde kórsetedi

NUR-SULTAN. QazAqparat – «Habar» telearnasy «Eýrovıdenıe» halyqaralyq án baıqaýynyń jartylaı fınaldary men aqtyq kezeńin tikeleı efır arqyly kórsetedi. Baıqaý 18-22 mamyr kúnderi aralyǵynda Nıderlandynyń Rotterdam qalasynda ótedi. Bul týraly QazAqparat «Habar» telearnasynyń baspasóz qyzmetine silteme jasap habarlaıdy.

18 jáne 20 mamyr kúnderi (mamyrdyń 18-inen 19-yna jáne 20-synan 21-ine qaraǵan túnderi) Nur-Sultan ýaqytymen saǵat túngi 01:00-de jartylaı fınaldar, al 22 mamyrda (mamyrdyń 22-inen 23-ine qaraǵan túni) saǵat 01:00-de – grand-fınal ótedi.

Baıqaýǵa 39 el qatysady. Olardyń qataryna 2020 jyly ótkizilmegen baıqaýdyń Armenııa jáne Belarýsten basqa barlyq qatysýshy elder kirdi. Vengrııa men Chernogorııa qarjy sebepterimen baıqaýǵa qatysýdan taǵy bas tartty.

Án baıqaýyna Eýropa habar taratý odaǵyna múshe elderdiń ótinim bergen bir ókilinen qatysyp otyr. Festıval tikeleı efırde ótkizilýde. Bıyldan bastap buǵan deıin jazyp alynǵan bek-vokaldy paıdalanýǵa ruqsat berilgen. Bul delegatsııa músheleriniń sanyn qysqartý, árbir ótinimniń shyǵarmashylyq áleýetin keńeıtý jáne habar taratýshy uıymdastyrýshynyń tehnıkalyq júktemesin azaıtý maqsatynda jasalyp otyr.

Kórsetilimdi «Habar» telearnasynyń kórermenderi úshin tanymal qazaqstandyq júrgizýshiler Qaldybek Jaısanbaı men Mahabbat Esen júrgizedi.

«Eýrovıdenıe» — Eýropa habar taratýshy odaǵyna múshe elderdiń estradalyq án baıqaýy. Ol 1956 jyldan beri jyl saıyn ótkizilip keledi, álemde eń tanymal sporttyq emes sharalardyń biri bolyp tabylady. Aýdıtorııasy – 600 myń kórermenge deıin. Shoý aǵylshyn jáne frantsýz tilderinde ótedi. Qatysýshy elderdi jartylaı fınaldarǵa úlestirý jerebe arqyly júzege asyrylady. Fınalǵa qatysýshylardyń eń kóp sany – 26 (2015 jyly ǵana 27 qatysýshy bolǵan). Baıqaýdy ótkizýshi el men «úlken bestik» (Ispanııa, Germanııa, Italııa, Ulybrıtanııa, Frantsııa) fınalǵa kepildi túrde qatysady.