Qazaqstanda eýropalyq kapıtaldyń qatysy bar 3 myńnan astam kompanııa jumys isteıdi

ASTANA. QazAqparat – Qazaqstannyń Eýropalyq Odaqpen ózara is-qımyly 29 negizgi baǵyt boıynsha belsendi damyp keledi. Bul týraly Memleket basshysy Qasym-Jomart Toqaev «Ortalyq Azııa – Eýropalyq Odaq» basshylarynyń ekinshi kezdesýinde aıtty, dep habarlaıdy QazAqparat.

«Qazaqstannyń Eýropalyq Odaqpen ózara is-qımyly 29 negizgi baǵyt boıynsha belsendi damyp keledi. Eýropalyq Odaqqa múshe memlekettermen keńeıtilgen áriptestik jáne yntymaqtastyq týraly kelisim bar. Qazaqstanda Shell, Eni, Total, Air Liquide, Alstom, Siemens jáne basqa transulttyq korporatsııalardy qosa alǵanda, eýropalyq kapıtaldyń qatysýymen 3 myńnan astam kompanııa jumys isteıdi», - dedi Memleket basshysy.

Prezıdent qos taraptyń jan-jaqty áriptestigi sırek metaldar, «jasyl» sýtegin óndirý sııaqty strategııalyq mańyzdy salalardaǵy perspektıvaly jańa ýaǵdalastyqtar arqyly nyǵaııatynyn atap ótti.

«Alǵa bastaıtyn jobalardyń biri – Svevind nemis-shved kompanııasynyń jel jáne kún elektr stansalaryn ornatý jáne Qazaqstanda úsh mıllıon tonna «jasyl» sýtegi óndirý zaýytynyń qurylysyn bastaýy boldy. Bul EO-nyń osy ónimge degen qajettiliginiń shamamen 20%-yn quraıdy», - dedi Qasym-Jomart Toqaev.

Aıta keteıik, Prezıdent Qasym-Jomart Toqaev Ortalyq Azııa memleketteri men Eýropalyq Odaq basshylarynyń ekinshi kezdesýine qatysý úshin Sholpan-Ata (Qyrǵyzstan) qalasyna jumys saparymen bardy.