Qazaqstanda et pen sút ımporty azaıyp keledi
«Mal basy men mal sharýashylyǵy ónimderin ulǵaıtý úshin bıyl 108 mlrd teńge bólinip otyr. Bul sharalar mal men qus sanynyń artýyna, mal sharýashylyǵy ónimderiniń óndirisine oń áserin tıgizedi. Nátıjesinde osy salaǵa salynǵan ınvestıtsııa ulǵaıyp, ótken jyly 67% ósip, 100 mlrd teńgeden asty», – dedi Premer-Mınıstr Úkimettiń búgingi otyrysynda.
Onyń aıtýynsha, mal sharýashylyǵy salasynyń áleýmettik mańyzy bar birqatar ónimderi boıynsha ımportqa táýeldilik aıtarlyqtaı tómendegen. Import sút óndirisi boıynsha 45%-ten 39%-ke deıin, qus etiniń óndirisi boıynsha 51%-ten 32%-ke deıin azaıǵan.
«Mańyzdy mindet – mal sharýashylyǵy ónimindegi otandyq óndiristiń úlesin arttyryp, azyq-túlik qaýipsizdigin qamtamasyz etý. Ol úshin birqatar problemalyq máselelerdi sheshý qajet. Saladaǵy ósimdi tolyq qamtamasyz etýge múmkindik bermeıtin eń basty kedergi – jemshóp óndirisi. Aýyspaly egistegi, birinshi kezekte sýarmaly jerlerdegi jemshóp daqyldarynyń úlesin keńeıtýdi jergilikti atqarýshy organdar tıisti deńgeıde júrgizbeı otyr», – dedi Á. Smaıylov.