Qazaqstanda eSIM engiziledi

NUR-SULTAN. QazAqparat – Qazaqstanda 5G engizilgennen keıin uıaly telefondarǵa eSIM engizý máselesi qarastyrylyp jatyr. Bul týraly búgin Úkimet úıindegi baspasóz máslıhatynda «Qazaqtelekom» AQ basqarmasynyń tóraǵasy Qýanyshbek Esekeev aıtty, dep habarlaıdy QazAqparat tilshisi.

«ESIM boıynsha jańa tujyrymdama bar. Ol chıp túrindegi klassıkalyq sım-kartanyń baǵdarlamalyq deńgeıde jasalatyndyǵyn bildiredi. Qazirgi ýaqytta uıaly baılanys operatorlary eSIM tujyrymdamasyn ázirlep jatyr», - dedi ol.

Osy rette Qazaqtelekom basshysy taıaý aralyqta bul baǵyttaǵy alǵashqy sheshimderdiń jarııa etiletindigin aıtty.

«Sol kezde uıaly telefonǵa sım-kartany chıp salmastan baǵdarlama túrinde jasaýǵa bolady. Bul nusqa qazir talqylanyp jatyr. Menińshe, 5G qosylǵannan keıin tehnologııalardyń basym bóligi eSIM negizinde engiziledi», - dedi Q.Esekeev.

Aıta keteıik, búgingi Úkimet otyrysynda Qýanyshbek Esekeev 5G tehnologııasyn testileý nátıjesin jarııa etip, onyń barysynda týyndaǵan birqatar problemany ataǵan edi.