Qazaqstanda erli-zaıyptylardyń 16 paıyzy bedeýlikke ushyraǵan

ASTANA. QazAqparat - Elimizdegi erli-zaıyptylardyń 16 paıyzǵa jýyǵy bala kótere almaıdy. Bul týraly búgin Astanada QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń kezekti otyrysy aldynda QR Densaýlyq saqtaý jáne áleýmettik damý vıtse-mınıstri Alekseı Tsoı málim etti.

«Memleket áıelder men balalardyń densaýlyǵyna ereshe nazar aýdaryp otyrǵandyǵyn bilesizder. Bul turǵyda daıarlanǵan kóp baǵdarlamalar búginde tıimdi jumys isteýde. Búgin otyrysta erlerdiń densaýlyǵy máselesin kóteremiz. Sebebi, statıstıkalyq málimetter er adamdarǵa nazar aýdarý qajettigin baıqatyp otyr», - dep toqtaldy A. Tsoı.

2015 jyldyń qorytyndysy boıynsha elimizde erlerdiń ómir uzaqtyǵy áıelderge qaraǵanda 9 jylǵa kem kórinedi.

«Eńbekke qabiletti jastaǵy ólim-jitimge toqtalsaq, osy rette erlerdiń qaza bolýy 24 paıyzǵa artyq. Elimizdegi erli-zaıyptylardyń 16 paıyzǵa jýyǵynda bedeýlik problemasy bar, onyń ishinde 48 paıyzy erlerdiń urpaqsyzdyǵy sebebine baılanysty»,-dedi vıtse-mınıstr.

Densaýlyq saqtaý jáne áleýmettik damý mınıstrligi málimetine qaraǵanda, elimizde erlerdiń reprodýktıvti júıesi aýrýlary tynys alý organdarynyń, qan aınalymy júıesi men as qorytý aýrýlarynan keıingi taralýy boıynsha tórtinshi oryn alady. 2015 jyly ýroandrologııalyq aýrýlardyń 591 myń oqıǵasy tirkeldi. Búginde osy aýrýlardy anyqtaý úshin elimizdiń barlyq óńirlerinde ýrologııalyq jáne andrologııalyq kómek kórsetetin medıtsınalyq uıymdar quryldy. Olardyń aıasynda Erler densaýlyǵy men otbasylyq uzaq ómir súrý ortalyqtary jumys isteı bastady. 2015 jyly osy ortalyqtarda erlerdiń urpaqty bolý júıesi aýrýlary boıynsha 46 606 er adam tekserýden ótti jáne emdeldi.