Qazaqstanda endi beıbit jıyndar men sherýler qalaı ótedi - vıtse-mınstr

NUR-SULTAN. QazAqparat – Aqparat jáne qoǵamdyq damý vıtse-mınıstri Danııar Esın elimizde qabyldanǵan beıbit jınalystar týraly zańnyń ereksheligi týraly aıtyp berdi, dep habarlaıdy QazAqparat tilshisi.

«Buǵan deıin habarlaǵanymyzdaı, beıbit jınalystar men mıtıngilerdi, pıketterdi ótkizýde tek habarlandyrý tártibi engizilip jatyr. Aldaǵy ýaqytta uıymdastyrýshy 5 kún buryn ǵana jergilikti bılikke beıbit jınalys ótkizetini týraly habarlasa boldy. Beıbit jıyndy ótkizýde ákimdiktiń kelisimi talap etilmeıdi. Jergilikti atqarýshy organ habarlamany alǵannan keıin beıbit jınalysty ótkizýge kómek kórsetedi. Eger beıbit jınalysty ótkizý maqsaty zańǵa qaıshy kelse, ákimdik úsh jumys kúni ishinde ony ótkizýden bas tartýy múmkin. Biraq bas tartýdyń naqty negizi bolýy tıis», - dedi Danııar Esın OKQ-da ótken baspasóz máslıhatynda.

Qalǵan jaǵdaıda ákimdik uıymdastyrýshyǵa beıbit jınalys ótkizýdiń basqa da jaǵdaıyn jasaýy, ony ótkizgizbeı qoımaýy kerek.

«Demonstratsııa nemese sherý ótkizý úshin habarlandyrýdyń basqa formasy – kelisim alý úshin ótinim berý kerek. Demonstratsııa nemese sherý ótkizýge kelisim alý úshin 10 jumys kúni ishinde berilýi tıis. Ótinim 7 jumys kúni ishinde qaralady. Ótinimniń basty ereksheligi – onda qatysýshylar júrip ótetin baǵdar, joldyń basy men aıaǵy, uzaqtyǵy, kólik quraldaryn paıdalaný týraly málimet kórsetilýi kerek. Sonymen qatar zań boıynsha beıbit jınalystardy ótkizýdiń balamaly oryndaryn mindetti túrde usyný quqyǵy da qarastyrylǵan. Mundaı ótinimderdiń uzaq qaralýy – kóshelerdi jabý, sharaǵa qatysy joq azamattar men bızneske belgili bir kedergilerdi keltirý yqtımaldyǵyna baılanysty», - dedi Danııar Esın.